MAKLN atribui bolsa estudu ba veteranu Bobonaro nia oan 165
BOBONARO, 28 fevereiru 2023 (TATOLI) – Ministériu ba Asuntu Komantente Libertasaun Nasionál (MAKLN) atribui loke vaga bolsa estudu ba kombatente no mártir libertasaun nasionál iha Munisípiu Bobonaro nia oan hamutuk 165 hodi hahú estudu iha tinan akadémiku 2023.
Sekretáriu Ezekutivu Konsellu Kombatente Munisípiu Bobonaro, Moisés Ramos, esplika vaga ne’e sei loke durante períodu loron 30, hahú hosi segunda, loron 27 fulan ne’e to’o loron 28 fulan-marsu tinan 2023.
Notísia relevante: Veteranu Bobonaro nia oan 20 sai benefisiáriu subsídiu $500
“Ami simu hosi ensinu báziku to’o ensinu superiór, ensinu báziku tinan ida-ne’e sei simu na’in-10, ensinu pre-sekundária na’in-30, sekundáriu 50, universidade 70 no universidade ne’ebé iha rai-li’ur na’in-lima,” nia informa ba jornalista sira, iha kna’ar-fatin, tersa ne’e.
Nia haktuir, tinan kotuk Governu atribui ba ema na’in-100 de’it maibé tinan ne’e aumenta tán, tanba ne’e husu ba komandante no mártir sira-nia oan ne’ebé sei eskola bele mai aplika.
“Kona-bá kritériu bele mai haree direita iha edifísiu konsellu kombatente munisipál Bobonaro,” nia dehan.
Tinan ne’e MAKLN loke vaga bolsa estudu 1.145 ba territóriu laran tomak no sei fahe 165 ba kada munisípiu no Rejiaun Administrativu Espesiál Oe-Cuse Ambeno (RAEOA) ho totál orsamentu ne’ebé prevee hamutuk $1.735,500.00.
Notísia relevante: Governu atribui bolsa estudu ba veteranu nia oan 100-resin iha 2023
Jornalista : Sérgio da Cruz
Editór : Evaristo Soares Martins
