DILI, 06 marsu 2023 (TATOLI)—Primeiru Ministru (PM), Taur Matan Ruak, liuhosi nia Gabinete semana kotuk, hatun ona despaixu ba Ministériu Turizmu Komérsiu no Indústria (MTKI) hodi halo preparasaun ba akontesimentu fenómenu eklipse solar ne’ebé sei akontese iha Timor-Leste, 20 abril 2023.
Diretór Jerál Turizmu MTKI, Jelino Soares, hateten despaixu ne’ebé Gabinete PM haruka ba MTKI ne’e, ko’alia kona-ba preparasaun no haruka MTKI koordena ho Ministériu Finansa (MF) oinsá atu tau orsamentu ba iha eventu ne’e, tanba turista sira sei mai hare’e direita fenómenu ne’e.
“Gabinete PM liuhosi nia Gabinete iha semana kotuk haruka ona despaixu mai. Bazeia ba despaixu ne’e iha tempu badak ami sei halo fali proposta kona-ba estrutura no Komisaun Organizadora ba iha eventu eklipse solar ne’e, ba Ministru MTKI hodi aprova atu ita halo ona preparasaun durante turista sira mai partisipa iha eventu ne’e,” Diretór Jerál Turizmu MTKI, Jelino Soares hateten ba Agência Tatoli, iha nia knaar-fatin Farol, Dili, segunda ne’e.
Notisia relevante : Fenómenu eklipse solar, sientista besik 100 reserva ona fatin iha Timor-Leste
Nia dehan, kona-ba orsamentu parte MTKI halo ona enkontru ho MF. Iha sorumutu ne’e MF rasik hatan ona iha orsamentu maibé MTKI tenke kria Komisaun Oragnizadora nune’e bele hatene atividade saida mak atu halo no MF prevee tuir Item ne’ebé Komisaun Oraganizadora prepara.
“Iha tempu badak ita sei haruka proposta ba Ministru MTKI atu aprova. Ne’ebé bainhira aprova ona MF mós sei prevee montante orsamentu ne’e. Ho orsamentu ne’e, ita sei halo atividade lubuk ida liuliu kulturál sira, tanba turista sira mai antes, ida ne’e ita presiza halo preprasaun másimu,” nia hateten.
Notisia relevante : DNMG : Fenómenu eklipse solar híbridu sei akontese minutu ida ho balun
Jornalista : Arminda Fonseca
Editora : Armandina Moniz
