DILI, 06 marsu 2023 (TATOLI) — Asosiasaun Defisiente Timor-Leste (ADTL) husu ba Xefe Estadu atu aprova Dekretu-Lei kona-ba oinsá atu uza surat-tahan vota iha braille, hodi garante konsulta sekretu ba ema sira ne’ebé la ho neon-susar iha eleisaun futuru.
“Nu’udar ema ho defisiénsia, ami husu asesor asuntu Inkluzaun sosiál Prezidénsia Repúblika nian atu informa Xefe Estadu kona-ba asesibilidade ba ema ho defisiénsia sira. Ami espera katak eleisaun parlamentár tinan ida-ne’e sei inkluzivu no asesivel ba sidadaun hotu-hotu, liuliu sira-ne’ebé ho defisiénsia, “Portavóz ADTL, Caceres Nunes, hateten ba Tatoli.
Notísia relevante:Susesu eleisaun, CNE-STAE espera kontribuisaun sidadaun hotu
Nia dehan, ema ho kondisaun defisiénsia matan hamutuk 200 mak iha kompeténsia atu lee sistema braille. Nune’e ADTL husu mós ba Komisaun Nasionál Eleitorál (CNE) no Sekretariadu Tékniku Administrasaun Eleitorál (STAE) atu kria kondisaun hirak ne’ebé presiza hodi fasilita ema ho defisiénsia sira-nia votu iha eleisaun sira tuirmai. Organizasaun ne’e mós husu ba partidu polítiku sira atu labele hetan diskriminasaun bainhira ko’alia kona-ba ema ho defisiénsia sira iha kampaña ba Eleisaun Parlamentár.
Tuir dadus ADTL nian husi tinan 2015, ema ho defisiénsia hamutuk 38,118 iha Timor-Leste, ne’ebé liu 14,000 iha problema vizaun, 7,000 mak moras mentál no sira seluk mak defisiénsia tilun.
Asosiasaun ne’e agradese ba Komisaun A Parlamentu Nasionál ne’ebé aprova proposta atu uza surat-tahan vota ne’e.
Notísia relevante: CNE rekomenda Governu introdús sistema braille iha eleisaun parlamentár 2023
Jornalista : Osória Marques
Editór : Rafael Ximenes de A. Belo
