iklan

NASIONÁL, ELEISAUN

Susesu eleisaun, CNE-STAE espera kontribuisaun sidadaun hotu

Susesu eleisaun, CNE-STAE espera kontribuisaun sidadaun hotu

DILI, 06 marsu 2023 (TATOLI) – Prezidente Komisaun Nasionál Eleisaun (CNE), José Agostinho Belo, hateten, atu iha mudansa, presiza partisipa iha eleisaun.

“Ema ne’ebé konkorre iha Eleisaun Parlamentar ne’e iha figura ne’ebé di’ak. Nune’e husu ita atu labele tau kestaun dehan obrigatóriu ka la’ós obrigatóriu maibé tau konfiansa ida katak iha eleisaun ne’e sei halo mudansa ba buat ruma. Tanba ne’e CNE ho STAE nia prezensa iha imi-nia leet hodi hamutuk halo votasaun ida-ne’ebé rasionál no ho responsabilidade hodi eleisaun ne’e la’o ho susesu no di’ak ba ita hotu,” autoridade másima CNE ne’e hateten, iha Progama Talkshow ‘Hakat ba Uma Fukun’, Tatoli, iha Farol, Dili, ohin.

Iha ámbitu ne’e, Diretór Jerál Sekretariadu Administrasaun Eleitorál (STAE), Acilino Manuel Branco, husu ba sidadaun sira hotu atu kontribui ba Eleisaun Parlamentár nune’e hetan susesu ho integridade no responsabilidade.

“Ami husu ita-boot sira-nia konfiansa mai ami órgaun eleitorál rua (STAE-CNE, red) no ami komprometidu mezmu ami iha dezafiu maibé ami la la’o mesak, ami sei konta ho ita-boot sira-nia kontribuisaun hodi hetan susesu iha eleisaun ne’ebé integridade, kredibilidade,” ezekutivu ne’e dehan.

Nia mós enkoraja, Munisípiu Ataúro, Postu Administrativu Hatulia B, Postu Lore no suku ne’ebé harii iha tinan 2017 nian atu atualiza Kartaun Eleitorál no halo resensiamentu eleitorál ba kartaun eleitorál.

Iha biban ne’e, Diretór Observatária Igreja ba Asuntu Sosiál, João Belo, hateten, CNE ho STAE hala’o knar nu’udar órgaun eleitorál hodi implememta, superviziona no monitoriza lala’ok Eleisaun. Nune’e, nia husu sidadaun hotu atu apoiu órgaun eleitorál rua ne’e.

“Husu sidadaun sira hotu la’ós ami de’it (OIPAS no observadór seluk, red) mak halo monitorizasaun maibé ita-boot sira mós nu’udar apoiu ida ba ita-nia órgaun eleitorál atu bele iha funsionamentu eleitorál la’o ho di’ak no lori ita-nia naran ba mundu rai liur hodi rekoñese no fasilita ita nune’e lori ita ba iha adezaun liuhusi prosesu ne’ebé demokrátiku no susesu. Sidadaun hotu tenke konsiente mak iha dezenvolvimentu nasaun no povu ne’e nian,” Belo dehan.

Entretantu, númeru eleitór to’o iha fulan – dezembru 2022 hamutuk 878.712 ne’ebé kompostu hosi Aileu 34.706 , Ainaro 46.945 , Ataúro 2.600 , Baucau 98.629 , Bobonaro 72.811 , Cavalima 48.830 , Dili 192.934 , Ermera 84.361 , Lautém 49.380 , Liquiça 51.925 , Manatuto 35.999 , Manufahi 41.574 , RAEOA 53.151 no Viqueque iha eleitór hamutuk 58.867 . Nune’e mós , eleitór ne’ebé agora resensiadu no atualizadu iha diáspora hamutuk 6.944 ne’ebé kompostu hosi Austrália iha eleitór hamutuk 1.462 , Korea Súl 1.237 , Irlandia Norte 2.185 , Portugál 1.241 no Reinu Unidu iha eleitór hamutuk 819.

Jornalista   : Osória Marques

Editór         : Rafael Ximenes de A. Belo

iklan
iklan

Leave a Reply

iklan
error: Content is protected !!