CAC hahú inkere funsionáriu HNGV ne’ebé suspeita kobransa ilegál

DILI, 07 marsu 2023 (TATOLI) – Diretór Investigasaun Komisaun Anti-Korrupsaun (CAC, sigla portugés), José Veridiál, dehan CAC halo ona investigasaun ba funsionáriu hosi Hospitál Nasionál Guidu Valadares (HNGV) ho insiál ZO ne’ebé suspeita halo kobransa iligál.
CAC hanesan orgaun polísia kriminál, espesializada tuir lei númeru 8/200 kona-ba lei CAC nian, iha artigu 5 fó kompeténsia ba CAC atu bele halo indentifikasaun no detensaun ba sidadaun ne’ebé prátika aktu subornu no prátika krime korupsaun seluk.
“Tanba ne’e, bazea ba kompeténsia ida ne’e mak ohin ita bo’ot sira haree ekipa CAC bá kedan iha Hospitál Guidu Valadares (HNGV) hodi ba hasoru ita-nia médika ne’ebé mak deskonfia hala’o aktu subornu ida ne’e. Hodi lori nia mai iha edifísiu CAC hodi halo prosesu identifikasaun ba nia”, José Veridiál, hateten ba jornalista sira iha edifísiu CAC, tersa ne’e.
Nia informa, prosesu identifikasaun ba médika ne’e sei la’o.
“Agora identifikasaun ba nia sei kontinua lao hela ne’ebé ha’u hanoin prosesu identikasaun remata mak ita foin hatene”, nia informa.
Diretór dehan, CAC iha de’it oras 12 hodi halo identifikasaun ba ema ida, hafoin ida ne’e CAC sei liberta hikas.
José Verdiál esplika atu detein ka la’e, ne’e depende ba prosesu identifikasaun
“Ha’u hanoin atu detein ema ne’e ka lae, ne’e depende ba prosesu identifikasaun mak ita haree. Kuandu prova sufisiente ka naton atu halo detensaun ba ema ne’e, ita halo detensaun kedan ba ema ne’e no ita komunika kedan ba Ministeriu Públiku atu bele informa ba Tribunál. Maibé kuandu prova la sufisiente ita sei liberta ema ne’e iha oras 12 nia-laran”, José Verdiál konklui.
Notísia relevante : Funsionáriu HNGV halo kobransa ilegál iha ona prosesu investigasaun
Jornalista: Natalino Costa
Editór : Zezito Silva

