EKONOMIA, HEADLINE, MUNISÍPIU, OÉ-CUSSE (RAEOA)

EDTL Oé-Cusse hahu normaliza poste ne’ebé hetan estragu hosi dezastre naturál

EDTL Oé-Cusse hahu normaliza poste ne’ebé hetan estragu hosi dezastre naturál

EDTL Oé-Cusse hahu normaliza poste ne’ebé hetan estragu hosi dezastre naturál. Imajen EDTL.

OÉ-CUSSE 07 marsu 2023 (TATOLI) – Ekipa tékniku hosi Eletrisidade Timor-Leste (EDTL) iha Rejiaun Administrativa Espesiál Oé-Cusse Ambeno (RAEOA), hahú hadi’a ona poste no liña elétrika sira-ne’ebé hetan estragu hosi dezastre naturál.

Xefe Departementu EDTL Oé-Cusse, Armindo Mendonça, informa, durante akontese anin-boot akompaña ho udan, ahi lakan no mate tanba afeta ba poste no fiu balu monu iha fatin hotu, nune’e hafoin udan-been menus ekipa tékniku sira hahú halo ona operasaun.

“Foin daudaun ne’e anin-boot no udan, dalaruma ahi mate, ne’e tanba poste balu monu no fiu sira balu mós balu, tán ne’e ita-nia tékniku agora lori ona poste sa’e ba sub-rejiaun sira atu hadi’a tanba antes ne’e ita identifika ona,” Armindo Mendonça, ko’alia iha Oé-Cusse, tersa ne’e.

Xefe Departementu ne’e hatutan, dezastre naturál ne’e akontese anin-boot no udan, afeta maka’as iha sub-rejiaun Nítibe fiu monu barak iha fatin-fatin, tanba iha-ne’ebá  anin-boot, fiu sira monu beibeik to’o poste balu kotu no monu.

Nune’e mós iha sub-rejiaun Oésilo, liuliu mota Noél-Ekat, rai halai poste balu konsege monu, situasaun ne’e akontese mós iha Pante Makasar, liuliu mota Kinloki depois Pássabe mós hanesan, maibé tékniku sira hahú halo ona normalizasaun iha fatin sira-ne’e.

Nia informa, difikuldade ne’ebé tékniku sira enfrenta iha baze, primeiru kondisaun estrada no transporte, tanba bainhira mobiliza postu susar tebes atu ultrapasa mota no kondisaun estrada nakonu ho tahu.

“Maibé ita-nia tékniku sira hahú halo ona normalizasaun iha fatin sira-ne’e, maske estrada no transporte maka difikulta tebes ami-nia servisu maibé ezijénsia komunidade ba nesesidade hotu-hotu, entaun ita tenke ba,” nia afirma.

Xefe Departamentu ne’e, husu konstribuisaun hosi komunidade, bainhira akontese dezastre ruma liuliu afeta fasilidade eletrisidade nian, presiza informa ba tékniku sira-ne’ebé destaka ona iha nível sub-rejiaun sira nune’e bele hetan normaliza imediata.

“Ha’u husu ba konsumidór sira hotu, presiza ita hotu nia pasiénsia, tanba natureza afeta ba buat barak, maibé tékniku iha EDTL esforsa nafatin ho maneira ne’ebé iha, hodi hadi’a ita-nia liña ne’ebé hetan dezastre, la presiza ezije maibé ami presiza informasaun nune’e ami bele ba hadi’a lalais,” nia husu.

Purtantu, totál funsionáriu ne’ebé presta servisu iha Departementu Eletrisidade Oé-Cusse hamutuk na’in-63 komposta hosi permanente no kontratadu.

 Jornalista   : Abílio Elo Nini
Editór          : Evaristo Soares Martins

iklan
iklan

Leave a Reply

iklan
error: Content is protected !!