OÉ-CUSSE 08 marsu 2023 (TATOLI) – Projetu sentru formasaun ba profesór sira iha Rejiaun Administrativa Espesiál Oé-Cusse Ambeno (RAEOA) nia progresu fíziku atinje ona pursentu 15.
Diretór Rejionál Infraestrutura, Cândido dos Reis Amaral, informa, tuir loloos projetu ne’e kompañia entrega ba autoridade iha fulan-marsu tinan 2023 ne’e, maibé kompañia atraza iha mobilizasaun materiál nune’e autoridade sei estende tán ba fulan-tolu hodi konklui.
“Konstrusaun ne’e nia progresu fíziku to’o ona 15%, kompañia hala’o nafatin nia kna’ar no devér sei tempu lubuk ida nia bele termina ona servisu ne’e, tuir loloos kompañia tenke entrega konstrusaun ne’e ba autoridade iha marsu ne’e, maibé iha kestaun balu presiza kompañia halo ajustamentu,” Cândido Amaral, hatete iha Oé-Cusse, kuarta ne’e.
Diretór Obra Públika ne’e esplika, sentru formasaun ne’e kompleta kedas ho fasilidade sira hanesan, sala formasaun Informasaun Teknolojia (IT), sala formasaun ba profesór, kantina, ba futuru bele kapasita profesór sira liuliu iha Oé-Cusse.
“Kompañia iha komitmentu boot no obrigasaun atu halo hotu obra ne’e, tuir kontratu ne’ebé maka aseita ona, loloos remata iha marsu ne’e maibé antes ne’e iha kestaun balu kompañia presiza halo ajustamentu, maibé tuir kompañia tenke halo pedidu antes loron 30 kuandu kontratu termina,” nia informa.
Iha sorin seluk, tékniku hosi konstrusaun sentru formasaun profesór, Rofino Abi, informa, konstrusaun ne’e hahú ezekuta iha novembru 2022 maibé atraza iha mobilizasaun materiál tarde no impaktu mós hosi udan-been.
Nune’e nia promete iha fulan tolu nia laran sei esforsa hodi konklui iha fulan jullu tinan ne’e.
“Iha kuadru avizu ne’e kontratu remata iha loron 04 marsu tinan ne’e, maibé tanba durante ne’e ami hasoru difikuldade oioin, situasaun udan, loron feriadu, no order materiál tarde tanba maioria hosi estranjeiru Indonézia no buka badaen mós tarde, entaun afeitadu ba kontratu, maibé ami sei husu extende ba fulan tolu hodi garante projetu ne’e tenke remata iha fulan-jullu,” nia klarifika.
Entretantu, ezekuta konstrusaun ne’e hosi empreza Irmão Timor Unipesoál Lda númeru valór kontratu $374.755.81, osan ne’e Autoridade RAEOA prevee hosi Orsamentu Jerál Estadu (OJE) 2022 nian, ho durasaun servisu durante fulan-haat, hahú iha novembru sei konklui iha fulan marsu 2023.
Purtantu, medida ba konstrusaun ne’e naruk metru 50 ho nia luan sentímentru 9, sei kompleta kedan ho fasilidade sira hanesan, sala ba formasaun, sala komputadór, sala administrasaun, sala laboratóriu kona-bá prátika, inklui fasilidade seluk tan.
Notísia relevante: RAEOA lansa Sentru Formasaun Profesór nu’udar investimentu iha setór edukasaun
Jornalista: Abílio Elo Nini
Editor: Evaristo Soares Martins
