Dom Virgílio preokupa estudante bandalizmu
DILI, 15 marsu 2023 (TATOLI) – Arcebispu Metropolitana atuál Bispu Dioseze Dili, Dom Virgílio Cardeal do Carmo da Silva, preokupa ho estudante balun iha universidade Católica Timorense (UCT) de São João Paulo II hahú hatudu ona hahalok bandalizmu hodi riska no hakerek liafuan balun iha edifísiu universidade nian.
“Iha semana kotuk kuandu ha’u pasiar oituan iha edifísiu andár iha kotuk ne’ebá ha’u haree hetan ona hosi parte eskada kra’ik ba to’o andár leten ne’ebá ha’u haree mosu tiha ona hahalok bandalizmu balun ne’ebé hahú hakerek ona buat ruma iha parede sira. loloos Universidade Católika ida labele akontese hahalok sira hanesan ne’e,” Arcebispu Metropolitana Dili ne’e lamenta kestaun ne’e, bainhira partisipa serimonia inaugurasaun bibloteka no abertura tinan letivu 2023 iha Balide Dili, kuarta ne’e.
Notísia Relevante :Horta entrega livru rihun 3-resin ba UCT
Tanba tuir Nia universidade Católica Timorense iha ona planu atu hadi’a kondisaun infraestrutura no fasilidade sira iha tinan 2023 ba oin, tanba ne’e estudante no dosente sira persiza tulun instituisaun liuliu maka kuidade infraesturuta bázika ne’ebé konstrui ona atu apoiu prosesu aprendizazén.
“Ha’u apela dala ida tan ba estudante sira hotu tantu sira ne’ebé mai uluk ona no sira ne’ebé foin tama mai atu labele aplika hahalok bandalizmu iha universidade ida ne’e nia laran. labele hakerek buat saida de’it iha didin loloon ka parede kampus UCT nian atu nune’e iha tinan 2023 ne’e ita hotu bele evita hahalok a’at sira ne’e,” nia hatutan.
Nune’e husu ba estudante no dosente atu fó kontribuisaun ba instituisaun hodi koidadu infraestrutura bázika ne’e iha hodi dezenvolve liután universidade ne’e iha futuru.
Nia argumenta universidade katólika ninia kór diferensa ho universidade sira seluk tanba ne’e tenke disiplina. Maske universidade ne’e mai ho númeru ki’ik maibé bele hatudu ninia kualidade liuhosi kapasidade intelektuál.
Notísia Relevante :UCT hahú halo preparasaun simu avaliasaun institusionál hosi ANAAA
Jornalista: Tomé Amado
Editór : Agapito dos Santos
