Horta entrega livru rihun 3-resin ba UCT
DILI, 15 marsu 2023 (TATOLI)-Prezidente Repúblika, José Ramos Horta, iha kuarta ne’e, entrega ona livru hamutuk 3.400 ba Universidade Católika Timorense de São João Paulo II (UCT,sigla portugés) hodi fasilita estudante sira bainhira halo peskiza no estudu akadémika.
Horta entrega livru hirak ne’e iha ámbitu serimonia inaugurasaun biblioteka UCT São João Paulo II Balide Dili no abertura tinan akadémiku 2023.
Notísia Relevante :2023, PR Horta inaugura biblioteka UCT São João Paulo II
Livru literature inglés, portugués, relasaun internasionál no seluk tan, tuir nia durante ne’e, rai de’it iha biblioteka Palasiu Prezidensiál Bairu-Pité Dili. Tanba ne’e Xefe Estadu foti inisiativa hodi oferese ba UCT atu uza hodi fasilita prosesu aprendizazén lorloron nian.
“Prezidensiál oferese livru 3.400 ne’ebé uluk tau iha biblioteka Prezidente nian tanba Prezidente haree katak agora la presiza ona atu tau tan iha biblioteka Prezidénsia nian. tanba ne’e prezidénsia entrega livru sira ne’e ba universidade ne’e atu tulun estudante no dosente sira,” Horta hateten.
Apoiu ne’e meius ida atu halo intervensaun ba iha área edukasaun tanba durante ne’e sei menus livru iha biblioteka sira atu fasilita estudante sira bainhira halo peskizano estudu akadémika ruma.
Nune’e, Prezidente Repúblika sujere ba Governu liuhhosi Ministériu Edukasaun Juventude no Desportu (SEJD) hodi investe maka’as iha área teknolojia no tékniku professional sira.
“Ha’u husu Governu atu haree didi’ak kursu saida mak prioridade hodi korresponde ba nesesidade país nian ba polítika dezenvolvimentu iha futuru. Tanba sé lae estudante sira hili hodi estuda liu área ne’ebé konforme sira-nia hakarak iha umanidade hodi ignora tiha área importante iha siénsia teknólojia no formasaun tékniku profisionál no ikus mai hamosu dezempregu barak iha nasaun ne’e,”Nia hateten.
Durante ne’e, Horta observa katak timor-oan barak liu maka estuda iha área umanidade hodi ladun fó importansia ba iha área enjinaria, tékniku administrasaun, jestaun emprezariál, tékniku profesionál sira nune’e maka hamosu dezempregu iha rai-laran.
“Kuandu estudante Timoro-an ida maka hatene duni deside área prioridade ne’ebé nia hili atu estuda, ba futuru bele garante katak diploma ne’ebé nia hetan sei iha duni valór no bele lori orgullu ba família no mós ba nasaun,” nia hateten.
Ho apoiu livru hirak ne’e ba Universidade Católika Timorense, nia garante bele fasilita prosesu aprendizazen estudante sira nian ho di’ak liután.
Iha tempu hanesan Reitór UCT São João Paulo II, Pe. Joel Casimiro Pinto, hateten biblioteka ne’ebé ohin hetan inaugurasaun sai sentru aprendizazen ka fatin peskiza ba estudante atu halo peskiza no estuda akadémika.
“Objetivu hosi biblioteka ne’e maka prepara kondisaun ne’ebé favoravel ba estudante sira atu hala’o sira-nia estudu hala’o sira-nia peskiza no sai hanesan kuartu ida ba sira iha silénsiu nia laran hodi bele aproveita buat barak,” padre Joel hateten.
Notísia Relevante :UCT hahú halo preparasaun simu avaliasaun institusionál hosi ANAAA
Jornalista: Tomé Amado
Editór : Agapito dos Santos
