Komunidade Taiboko agradese Governu oferese cesta bázika
OÉ-CUSSE 16 marsu 2023 (TATOLI) – Komunidade sira iha suku Taiboko, sub-rejiaun Pante Makasar, Rejiaun Administrativa Espesiál Oé-Cusse (RAEOA), hanesan Joaquim Tafin no Paulina Bene, agradese no felisitasaun ba VIII Governu Konstitusionál tanba tau programa cesta bázika hodi oferese nesesidade bázika ba komunidade sira.
“Ami hakarak agradese ba VIII Governu Konstitusionál tanba kria programa ne’e hodi sustenta ita-nia komunidade nia nesesidade liuliu ai-haan, ho nune’e ami hakarak relata iha suku Taiboko totál benefisiáriu ne’ebé hetan aprovasaun hodi Governu hamutuk abitante 6.833,” xefe suku Taiboko Joaquim Tafim, hato’o felisitasaun ne’e iha serimónia distribuisaun realiza iha suku Taiboko, kinta ne’e.
Maibé atualizasaun baze dadus iha suku iha 2022, dadús ne’e iha mudansa, nu’ebé garante katak iha futuru sei lista reklamante, nune’e espera Governu bele mós tau atensaun.
“Tanba dadus atuál agora, iha 6.963, ne’ebé totál dadus aprovadu 6.833, ne’e ha’u fiar katak ba oin sei iha reklamante tanba uma-kain balu foin rejista balu mós mate, maibé totál uma foun ne’ebé aumenta iha 136,” nia katak.
Paulina Bene sente kontente tebes, tanba Governu haree di’ak no ajuda bebeik.
“Uluk $200 agora simu tán cesta bázika, ami simu foos, mina, káfe, deterjent no sasán seluk ne’bé ami hato’o agradese ba Governu Timor-Leste,” nia orgullu.
Koordenadór Cesta Bázika, Maximiano Neno atuál Adjuntu Prezidente Autoridade RAEOA ba asuntu Sosiál, husu ba família sira atu uza nesesidade bázika sira-ne’e ba nesesidade moris, maibé labele uza hodi hala’o négosiu iha merkadu.
“Espera katak komunidade Taiboko liuliu aldeia Maquelab kontente atu simu produtu cesta bázika ho ai-haan seluk, ne’ebé ohin ita distribui, ita presiza agradese ba VIII Governu Konstitusionál liuhosi Autoridade RAEOA,” Maximiano Neno, ko’alia iha ámbitu serimónia distribuisaun ne’e,” nia hatete.
Programa ne’e oferese ba povu Timor-Leste, sei kontinua distribui tán ba suku sira seluk, no la haree ba kór partidu.
“Ha’u husu de’it ba ekipa distribuisaun servisu hamutuk entre autoridade lokál sira no kompañia distribuisaun no komunidade hotu, atu serbisu hamutuk nune’e distribuisaun ne’e la’o ho susesu, karik iha família balu naran laiha lista ekipa prepara ona lista reklamante, nune’e ita hotu bele hetan,” nia fó hanoin.
Entretantu, distribuisaun cesta bázika iha suku Taiboko hodi kompañia Uma Oli Unipesoál Lda ho valór orsamentu $335,431.97, hodi distribui ba komunidade aldeia haat, Maquelab, Ulas, Nemun, no aldeia Hauboni ho totál benefisiáriu hamautuk 6.833.
Jornalista: Abílio Elo Nini
Editór: Evaristo Soares Martins
