DILI, 20 marsu 2023 (TATOLI) – Ministru Transporte no Komunikasaun (MTK), José Agustinho da Silva, husu ba setór privadu sira atu kontinua investe iha transporte aéreu, nune’e bele hatama reseita barak liután ba kofre Estadu.
“Governu liuhosi MTK fó oportunidade ba setór privadu atu kompete iha área ida ne’e hodi aumenta tan ita-nia konetividade aérea, hodi liga nafatin fatin sira ne’ebé maka ema barak bá, nomós lori ema mai iha ita-nia rai”, Ministru Transporte hatete iha ámbitu inaugurasaun aviaun Aero Dili, iha Aeroportu Comoro, segunda ne’e.
Membru Governu ne’e salienta, ba futuru halo melloramentu ba infraestrutura Aeroportu Internasionál Prezidente Nicolau Lobato tanba nu’udar odamatan boot nasaun nian, nune’e bele tulun dezenvolvimentu iha setór sira seluk, hanesan turizmu.
“Ida ne’e interligadu ho liña ministeriál sira seluk, hanesan mellora dezenvolvimentu iha setór turizmu presiza kria kondisaun ne’ebé mak di’ak, otelaria tenke prienxe rekizitu, ospitál tenke tuir padraun internasionál, nune’e bele atrai turista mai iha Timór”, nia esplika.
Aeroportu nu’udar odamatan boot ba konetividade aérea, ne’e duni Governu fó prioridade ba setór privadu sira atubele kompete iha área ida ne’e hodi hamoris no ajuda ita-nia turizmu. “Ita hotu hatene katak dezenvolvimentu ba aeroportu refere daudaun iha hela prosesu nia laran hodi halo tan estesaun ba pista ne’ebé mak oras ne’e ita iha de’it metru 1.850, nune’e estende ba kilómetru 2.1.
Biban ne’e, governante solisita ba operadór aviaun sira atu kumpri nafatin rekizitu tuir padraun organizasaun aviaun sivil mundiál nian.
Daudaun ne’e, Timor-Leste iha ona emprezáriu ida mak investe ona iha setór aéreu, Lourenço de Oliveira, naturalidade Ataúru, ne’ebé lori tama aviaun Aero Díli hodi bele halo ligasaun internasionál ho bandeira Timor-Leste nian.
Notícia relevante: Aviaun Aero Dili sei realiza vou komersiál dahuluk iha 28 marsu
Jornalista: Antónia Gusmão
Editora: Maria Auxiliadora
