DILI, 23 marsu 2023 (TATOLI)–Diretór Servisu Munisipál Jestaun Merkadu no Turizmu, Munisípiu Dili, Arthur Henriques, hateten Ministériu Turizmu Komérsiu no Indústria (MTCI,sigla portugués) maka iha kompeténsia atu halo kontrolu no manutensaun ba jardín sira iha kapitál Dili.
Nia rekoñese katak Munisípiu Dili iha duni Departamentu Turizmu maibé, ninia servisu maka atu fó formasaun ba Timoroan sira kona-ba kulinária ka tein, kona-ba resiklajen ba lixu, ne’ebe hetan apoiu hosi Heineken no USAID hodi fó apoiu ba programa hirak ne’e.
Notísia Relevante :AMD koloka ona pesoál seguransa iha jardin kapitál Dili
“Sanitasaun públiku no lampu iha Jardin sira ne’ebé at no keima sai kestaun ba Autoridade Munisípiu Dili (AMD) tanba até agora atividade hotu-hotu sentralizadu iha MTCI no seidauk delega podér ida ba ami hodi halo kontrolu,” nia hateten ba Tatoli, iha Matadouro Dili.
“MTCI halo koordenasaun ho AMD bainhira halo planu ruma hanesan halo Jardín ka manutensaun ruma maibé atu implementa ne’e MTCI mak iha kompeténsia,” nia esplika.
Entretantu, iha tinan 2021 liubá, Primeiru-Ministru (PM), Taur Matan Ruak, konvoka reuniaun ho Prezidente Autoridade Munisípiu (PAM) Dili, Guilhermina Filomena Saldanha, hodi atualiza progresu serbisu no simu orientasaun kona-ba dezenvolvimentu iha kapitál ne’ebé la’o hela no sei akontese iha futuru.
“Primeiru-Ministru hato’o preokupasaun kona-ba limpeza, liuliu vendedór ambulante, no mós kona-ba manutensaun orden públika,” Autoridade munisipál ne’e dehan hafoin hasoru Xefe Governu, iha Rezidénsia ofisiál Farol.
Kona-ba limpeza ba jardín públiku, tama ona iha planu munisípiu hodi halo limpeza rutina, nune’e vizitante sira bele vizita no laiha lixu.
Notísia Relevante :AMD koloka jardineiru na’in-tolu rega ai-funan iha jardin 05 de Maio
Jornalista : Osória Marques
Editór : Agapito dos Santos
