iklan

NASIONÁL

AMD koloka jardineiru na’in-tolu rega ai-funan iha jardin 05 de Maio

AMD koloka jardineiru na’in-tolu rega ai-funan iha jardin 05 de Maio

Ambiente Jardin 05 de Maiu Colmera, Dili, tersa (27/06). Imajen Tatoli/Francisco Sony.

DILI, 07 novembru 2022 (TATOLI)—Governu liuhosi Autoridade Munisípiu Dili koloka jardineiru na’in-tolu hodi toma-konta ba kuidadu rega ai-funan sira kuda iha jardin laran no bele hamoos iha área Nossa Senhora iha jardin 05 de Maio, Colmera, Dili.

“Ami na’in-tolu mak baibain halo limpeza hamoos lixu sira iha ne’e, kuda ai-funan no rega ai-funan sira iha estatua ne’e nia leet. Aleinde ne’e, karik ema soe foer iha ne’e ami hamoos,” Jardiñeiru, Marçal de Jesus Soares, hateten ba Agência TATOLI bainhira hala’o hela nia servisu rega ai-funan iha Jardin 05 de Maio, segunda ne’e.

Ai-funan sira-ne’ebé kuda iha Jardin 05 de Maio besik estatua Nossa Senhora ne’e balun sira foti iha sira-nia uma hafoin lori mai kuda.

“Ai-funan sira ne’e, ami lori iha uma mai hodi kuda no balun ami buka husi fatin seluk mai kuda fila-fali iha ne’e,” nia dehan.

Kona-ba bee, nia dehan, uluk seidauk iha bee sira lalin de’it bee hosi haris fatin hodi rega, maibé agora iha ona torneira ne’ebé bele hafasil sira-nia serbisu.

Maske nune’e, ho servisu ne’e durante sira hasoru difikuldade mak laiha farda ida-ne’ebé hatudu sira-nia identidade servisu nu’udar jardineiru.

“Ami-nia difikuldade liu mak ami-nia uniforme laiha no sasán sira-ne’ebé ami uza hanesan másakra mós laiha. Aleinde ne’e, luvas ne’e iha maibé fulan rua no tolu mak foin simu dala ida,” nia hateten.

Durante e’e, sira seidauk hala’o servisu iha jardin ne’e laiha ema-ne’ebé kuidadu ka tau-matan ba ai-funan sira iha Estatua Nossa Senhora iha Jardin 05 de Maio nia leet sira-ne’e, maibé agora ai-funan no ai-horis hotu komesa buras ona iha jardin ne’e.

Sira hala’o servisu ne’e hahú hosi segunda to’o sesta, ne’ebé hahú hosi tuku 06h00 dadeersan to’o tuku 12h00 loron manas mak deskansa, depois kontinua fali iha tuku 14h00 no sai iha 17h00 lorokraik.

Entretantu, jardiñeiru na’in-tolu ne’e nu’udar funsionáriu permanente 2011 nian, ne’ebé servisu ona hahú hosi loron 05 fulan-setembru 2022 to’o ohin loron hodi toma-konta ba limpeza no rega ai-funan iha Nossa Senhora iha Jardin 05 de Maio.

Enkuantu, saláriu ne’ebé sira simu la hanesan tanba tuir level, hanesan level 01 kada fulan simu $180.00 no level 02 simu $195.00.

Jornalista : Nelia Fernandes

Editór       : Cancio Ximenes

 

iklan
iklan

Leave a Reply

iklan
error: Content is protected !!