DILI, 11 novembru 2022 (TATOLI)—Governu, liuhosi Autoridade Munisípiu Dili (AMD) iha fulan outubru tinan ne’e, koloka ona pesoál seguransa iha jardin kapitál dili, hodi tau matan ba propiretáriu Estadu iha jardin sira.
Notísia Relevante: AMD sei koloka pesoál seguransa asegura propiretáriu Estadu iha jardin
“Ami-nia seguransa ne’ebé iha semana liubá ita hateten sei koloka iha outubru nia laran, agora kolokadu hotu ona iha jardin sira hanesan iha jardin Cristu Rei, Largo de Lecidere, Prezidente BJ-Habibie, GMNTV nia oin no jardin 12 de Novembru iha Moatel,” Adjuntu Prezidente Autoridade Munisípiu Dili (AMD), António Moniz Clau, hateten ba Agênsia Tatoli iha nia kna’ar fatin, Dili, sesta ne’e.
Tuir nia, pesoál seguransa ne’ebé Autoridade Munisípiu Dili koloka ona iha jardin kapitál Dili hahú iha loron 07 fulan outubru tinan ne’e.
Tanba ne’e, seguransa ne’ebé kolokadu ona iha jardin sira la’ós atu tau atensaun de’it ba iha asuntu seguransa maibé sira asegura mós vizitante sira bainhira ba jardin sira labele soe foer arbiru.
Aleinde ne’e, asegura mós ba estasionamentu katak vizitante sira labele para karreta no motor arbiru, ne’ebé sira (seguransa) nia knaar tolu (3) mak iha ne’ebá hanesan tau matan ba aset Estadu sira iha jardin, tau matan ba limpeza no tau matan ba estasionamentu,
“Tanba ne’e, garante katak orientasaun servisu ne’ebé ita fó ba sira tuir servisu ne’ebé ita haruka sira asina,” nia dehan.
Notísia Relevante: AMD sei kontrata pesoál seguransa tau matan ba jardin kapitál Dili
Jornalista : Nelia Fernandes
Editór : Cancio Ximenes
