DILI, 17 outubru 2022 (TATOLI)—Adjuntu Prezidente Autoridade Munisípiu Dili, António Moniz Clau, informa semana ne’e Autoridade Munisípiu Dili (AMD) sei koloka pesoál seguransa hahú servisu iha jardin kapitál Dili, nune’e asegura proprietáriu Estadu iha jardin.
Notísia Relevante: AMD sei kontrata pesoál seguransa tau matan ba jardin kapitál Dili
“Seguransa sira, iha semana ida ne’e sira hahú servisu iha Jardin iha kapitál Dili. Ita fahe ona rompi maibé ID card mak ita seidauk prepara tanba ita sei presiza sira-nia fotográfia. Agora iha ID card ne’e ami tau seguransa jardin, ezemplu, seguransa jardin Largo karik ami tau Largo tanba hosi ne’e ami orienta ona ba rekursu umanus. Hakarak ka lakohi, aban, sira iha terrenu ona,” António Moniz Clau informa ba Agéncia Tatoli, iha nia kna’ar fatin, fatin, Dili, segunda ne’e.
Nia esplika, pesoál seguransa sira-ne’ebé Autoridade Munisípiu Dili koloka iha jardin sira atu kontrola pprietáriu Estadu iha jardin laran no kontrolu mós lixu sira, nune’e ema labele so’e lixu arbiru no mós kontrola karreta no motor labele para tama iha jarin laran, maibé para iha parajen ne’ebé prepara ona.
Kona-ba seguransa sira halo servisu la tuir kna’ar ne’ebé sira iha, nia dehan, Autoridade Munisípiu Dili sei hasai seguransa sira-ne’ebé la halo tuir kna’ar servisu ne’ebé iha.
“Ita hasai, tanba sira ne’e kontratu bens servisu, se servisu ladi’ak ita halo avaliasaun ita hapara kontratu,” nia dehan.
Maske nune’e, ba seguransa sira-ne’ebé halo servisu iha jardin, kontratu la hanesan tanba seguransa balun servisu ona iha terrenu.
“Ita-nia seguransa balun hahú hosi abríl, maioria sira-ne’ebé servisu hahú iha abril ne’e jardin rua, hanesan Jardin Prezidente BJ Habibie no Largo de Lecidere. Agora ba jardin sira seluk, jardin 12 Novembru, 05 de Maio, Cristo Rei no GMNTV nia oin ne’e, hahú hosi fulan-outubru ne’e ita koloka ona pesoál seguransa hamutuk 38,” nia dehan.
Tuir nia, jardin rua hanesan Jardin Prezidente BJ Habibie no Largo de Lecidere ne’ebé Autoridade Munisípiu Dili tau seguransa ba servisu uluk, tanba ezijénsia ida mai hosi vendedór sira-ne’ebé mhalo negósiu iha ne’ebá.
“Nune’e, ita fó orientasaun ba Administradora Postu Administrativu Nain Feto atu asegura ita-nia maluk seguransa sira, tanba ne’e pesoál seguransa sira ita fó prioridade uluk ba sira, Tanba ema faan ikan no faan nuu sira iha ne’ebá, entaun ita fó prioridade ba sira servisu uluk iha ne’ebá,” nia afirma.
Jornalista : Nelia Fernandes
Editor : Cancio Ximenes
