INTL mak iha posibilidade sei imprime bulletin votu

DILI, 27 marsu 2023 (TATOLI)–Diretór Jerál Sekretariadu Tékniku Administrasaun Estatál (STAE), Acilino Manuel Branco, hateten iha posibilidade Institutu Nasionál Timor-Leste (INTL) maka sei imprime bulletin votu ba eleisaun parlamentár tinan 2023.

Nia dehan teknikamente STAE ko’alia ona ho empreza Estadu nian INTL ne’e, maibé sei hein aprovasaun hosi Governu liuhosi reuniaun Konsellu-Ministrus.

Notísia Relevante :STAE preparadu realiza eleisaun parlamentár

“Ba oin sei marka loron hodi ajusta ita-nia preparasaun sira no sei liuhusi Ministériu Administrasaun Estatál (MAE), nune’e indika ba Konsellu Ministru (KM) hodi hetan aprovasaun,” nia hateten ba jornalista sira, hafoin halo abertura formasaun ba fasilitadór STAE, iha Delta Nova, Dili, segunda ne’e.

Tuir nia Tribunál Rekursu daudaun ne’e públika ona lista partidu polítiku hamutuk 17 maka admitidu atu partisipa iha eleisaun Parlamentár ne’ebé tuir kaléndariu sei realiza iha loron 21 fulan-maiu 2023.

“Preparasaun ba bulletin votu mak horibainrua (25/03/23) ami halo ona Tribunál Rekursu hato’o ona ba STAE, no orsida STAE sei públika ba Jornál Repúblika kona-ba partidu polítika ne’ebé admitidu. Maibé ida-ne’e ami hein hela Tribunál Rekursu atu halo sorteiu depois mak ita ajusta ba modelu bulletin votu nian,” Acilino hateten.

Diretór Jerál STAE dehan iha tempu badak nia parte sei kontaktu ho partidu polítika sira atu oinsá mak bele hatama sira-nia emblema hanesan bandeira partidu nian nune’e bele kria modelu hamutuk ho Komisaun Nasionál Eleisaun (CNE) hodi aprezenta ba INTL hodi imprime iha tempu badak.

“Tuir kalendáriu ne’ebé iha katak podeser iha loron 3 ka 4 abríl ba oin ita halo ona produsaun,” nia hateten.

Sekretáriadu tékniku Administrasaun eleitorál STAE bazea ba artigu 18 husi lei eleitorál ba Parlamentu Nasionál, Númeru 6/2006, 28 dezembru, iha versaun dahaat no ikus hosi alterasaun lei Númeru 9/2017, 5 maiu, no konsidera dekretu prezidensiál Númeru 9/2023, 13 fevereiru, ne’ebé define iha loron 21 maiu 2023 hanesan loron eleisaun ba Parlamentu Nasionál, agora públika kalendáriu operasaun ba eleisaun parlamentár Repúblika Demokrátika Timor-Leste nian.

Nune’e periódu kampaña eleitorál ba eleisaun parlamentar tinan 2023 sei hahú iha loron 19 abríl 2023, ne’ebé sei la’o durante loron 30 nia laran no loron rua antes eleisaun.

Tuir orariu hahú loron, loron 26 fulan-marsu – Interpozisaun/aprezentasaun rekursu ba koletivu STJ/Tribunál Rekursu kontra desizaun admisaun/rejeisaun kandidatura sira nian;

loron 28 fulan-marsu – Koletivu STJ/Tribunál Rekursu deside kona-ba rekursu ne’ebé aprezenta ba desizaun admisaun/rejeisaun kandidatura sira nian;
Loron 27 ka loron 29 fulan-marsu – Publikasaun iha Jornál Repúblika kona-ba kandidatura sira ne’ebé admite ona ho definitiva;
Loron 28 ka loron 30 fulan-marsu – Sorteiu ba kandidatura sira ne’ebé admite ona hodi atribui ordenasaun iha boletin votu + afiksasaun / publikasaun ata.

ELEISAUN NO APURAMENTU REZULTADU

Loron 21 fulan-maiu (tuku 07.00 to’o tuku 15.00) – Loron eleisaun;
Loron 21 fulan-maiu – Hahú kontajen ba votu iha sentru votasaun no tuirmai haruka urna sira ba apuramentu munisipál/rejionál;
Loron 21 fulan-maiu – Hahú kontajen ba votu no apuramentu rezultadu iha sentru votasaun sira iha rai-li’ur;
Loron 21 to’o loron 23 fulan-maiu – Apuramentu rezultadu iha nivel munisipál/rejionál no haruka ata eleitorál no mós elementu sira seluk (votu reklamadu no aprezenta reklamasaun) ba CNE;
Loron 24 to’o loron 27 fulan-maiu – Apuramentu rezultadu iha nasionál (CNE);
Loron 27 to’o loron 30 fulan-maiu – CNE elabora ata apuramentu provizóriu ba rezultadu nasionál no afiksa/halo ata iha ninia sede;
Loron 29 fulan-maiu to’o loron 1 fulan-juñu – Prazu interpozisaun/aprezenta rekursu kona-ba rezultadu provizóriu nasionál ba koletivu STJ/Tribunál Rekursu;
Loron 31 fulan-maiu to’o loron 3 fulan-juñu – Koletivu STJ/Tribunál Rekursu deside rekursu sira ne’ebé aprezenta;
Loron 31 fulan-maiu to’o loron 2 fulan-juñu – CNE haruka ata rezultadu sira ba Tribunál, karik la aprezenta rekursu;
Loron 4 to’o loron 6 fulan-juñu – Tribunál Rekursu analiza dokumentasaun ne’ebé haruka husi CNE, valida no fó-sai rezultadu;
to’o loron 7 fulan-juñu – Publikasaun iha Jornál Repúblika kona-ba Akórdaun/desizaun Tribunál.