DILI, 29 marsu 2023 (TATOLI) – Vise-Ministru Negósiu Estranjeiru no Kooperasaun, Julião da Silva, aprezenta rejime kontratasaun pesoál hodi apoia ba atividade adezaun Timor-Leste nian ba Organizasaun Sudeste Aziátiku (ASEAN, sigla inglés) iha Konsellu Ministru, ne’ebé hetan ona aprovasaun.
“Rejime kontratasaun ida-ne’e aplika ba traballadór administrasaun públika ne’ebé kontratu hodi hala’o atividade sira ne’ebé relasiona ho adezaun Timor-Leste nian”, Ministru Koordenadór Asuntu Ekonómiku, Joaquim Amaral, afirma iha Palásiu Governu, kuarta ne’e
Portavós interinu Governu nian ne’e salienta katak prosesu kontratasaun ne’e sei hala’o bazeia ba prinsípiu legalidade transparénsia selesaun tuir méritu, imparsialidade, ho hanoin-di’ak, liberdade kandidatura no kondisaun no oportunidade ne’ebé hanesan.
Diploma ne’e prevee estabelesimentu ba komisaun téknika ida, liuhusi rezolusaun Governu nian, ne’ebé sei konta ho reprezentante husi liña ministeriál relevante sira no ne’ebé sei responsavel ba levantamentu nesesidade, determinasaun númeru vaga no funsaun, kompeténsia, abilitasaun sira ne’ebé presiza.
“Kontratadu hirak ne’e tenke iha abilitasaun akadémika mínima lisensiatura no sei klasifika iha kategoria rua tuir abilitasaun akadémika no esperiénsia profisionál. Inskrisaun sei hala’o liuhusi dalan eletróniku no prosesu seletivu inklui ezame eskritu eletróniku, ezame koñesimentu, ezame diskursivu no entrevista”, nia esplika.
Notísia relevante: Governu sei kria rejime kontratasaun pesoál apoia atividade adezaun Timor-Leste ba ASEAN
Jornalista: Antónia Gusmão
Editora: Maria Auxiliadora
