Kazu Elemloi, PCIC remete ona ba MP
DILI, 13 abríl 2023 (TATOLI) – Diretór Polísia Siéntifika Investigasaun Kriminál (PCIC, sigla portugés), Vicente Brito, dehan kazu omisídiu ne’ebé akontese iha Elemloi, Delta III, Suku Comoro, PCIC halo kedan auto notísia partisipasaun krime no remete ona ba Ministériu Públiku (MP).
“Depois akontesimentu omisídiu ne’e, iha loron lima nia-laran, PCIC halo kedan auto notísia partisipasaun krime no iha loron 13 fulan janeiru 2023, PCIC remete kedan ba Ministériu Públiku”, Vicente Brito hateten ba jornalista sira iha sentru kulturál Embaxada Portugal, kinta ne’e.
Nia salienta, kazu omisídiu Elemloi ne’ebé rezulta ema deskoñesidu oho Isac Sinarai da Costa iha hela Ministériu Públiku maibé seidauk delega fila fali mai PCIC.
“Kazu omisídiu Elemloi ne’e sei iha hela Ministériu Públiku, agora MP seidauk delega fila fali mai iha PCIC. Ami seidauk iha informasaun kona-ba ida ne’e, bainhira maka Ministériu Públiku atu delega mai fali ami”, Diretór PCIC hateten.
Hatan kona-ba suspeitu ba kazu omisídiu Elemloi, Diretór PCIC Vicente Brito lakohi fundamenta tanba prosesu ba kazu ne’e iha ona MP.
Iha fatin hanesan, Prokuradór Jerál Repúblika (PGR) Alfonso Lopez, hateten kazu omisídiu Elemloi ne’e agora MP halo hela investigasaun ka sei iha hela prosesu investigasaun, tanba ne’e, hanesan PGR lakohi adianta buat balun relasiona kazu ne’e. Tanba bele viola segredu justisa.
Alfonso esplika, iha Indonézia kuandu kazu sira hanesan ne’e, Prokuradór Jerál Repúblika labele koalia barak iha públiku.
“Ita nia lei la admite ema atu koalia konteúdu hosi kazu ne’e iha públiku. Tanba sé maka toman koalia kazu sira ne’e iha públiku, ne’e viola segredu justisa. Kuandu nune’e, ida ne’e kosidera krime sei kriminaliza, tanba ne’e ita evita koalia ida ne’e. tanba kazu sei iha hela prosesu investigasaun”, nia hakotu.
Rekorda falik katak matebian Isac Sinarai da Costa (20) oho hosi ema deskoñesidu iha área Elemloi Delta III, Suku Comoro, Postu Administrativu Dom Aleixo Munisipiu Dili iha tuku 02:00 madrugada, iha loron sesta 6 fulan janeiru 2023.
Jornlista: Natalino Costa
Editór : Zezito Silva
