UNDERTIM kompromete bainhira manan sei hamosu Governu Unidade Nasionál
DILI, 19 abríl 2023 (TATOLI) – Prezidente Partidu, Unidade Nasionál Demokrátiku Rezisténsia Timorense (UNDERTIM), Fransisco Guterres, hateten UNDERTIM kuandu manan iha eleisaun mak sei hamosu plataforma Governu Unidade Nasionál hodi hametin estabilidade polítika, ekonómika, sósiu kulturál, seguransa no defeza nasionál iha Timor-Leste.
“Iha eleisaun ida ne’e mak UNDERTIM mak ukun sei hamosu plataforma unidade governativa hodi bele hametin estabilidade polítika, ekonómika, sósiu kulturál, seguransa no defeza nasionál iha ita-nia rain”, Fransisco Guterres, informa iha kampaña dahuluk ho tipu konferénsia imprensa, iha sede UNDERTIM Becusse, ohin.
Nia husu ba povu tomak ne’ebé iha remota no iha sidade, prinsipalmente juventude sira buka servisu iha liur atu hotuhotu vota ba UNDERTIM bele hadia povu nia moris.
“Ba juventude no agrikultór sira, karik imi fó fiar liuhosi imi nia votu ba UNDERTIM iha loron 21 maio 2023 mak UNDERTIM ukun sei loke agrikultura modernu no hamosu kampu traballu liuhosi industriá, loke fabrika iha rejiaun ponta leste, sentru leste, fronteira sul, fronteira norte, Dili no Raeoa-Oecusse”, nia adianta.
Conselleiru Partidu UNDERTIM, Luis Januario de Fatima da Costa (Malema), dehan tempu to’o ona atu vota ba UNDERTIM hodi hadia povu nia moris.
“Fó hanoin ba malu katak nasaun ne’e atu ba oin presiza unidade povu tomak nian, presiza unidade partidu hotu-hotu nia matenek labele marjinaliza malu, labele hanoin aat ba malu, maibé fó hanoin ba malu, unifika malu nafatin hanesan partidu UNDERTIN nia prinsípiu katak manan ka lakon, oinsá fó sai ba públiku hodi fiar katak UNDERTIM prontu ba ukun sei hadia povu nia moris, sé la manan mak partidu ida ne’ebé manan pelumenus transforma Timor-Leste ba erra foun. Tanba mundu agora erra kompetitivu mak ita timoroan rasik la iha unidade, pás no estabilidade oinsá mak rai ida ne’e ba oin”, nia deklara.
Tanba ne’e, nia husu ba ema hotu tenke kria pas no estabilidade iha rai-laran atu povu bele moris hakmatek.
Iha konferénsia imprensa hetan akompañamentu husi observadór sira husi Komisaun Nasionál Eleisaun (CNE) no hetan seguransa másimu husi Polísia Nasionál Timor Leste (PNTL).
Jornalista : Felicidade Ximenes
Editór : Zezito Silva
