UNICEF-DFAT entrega ekipamentu suprimentu Banku Sangue ho unidade 70 ba MS
DILI, 27 abril 2023 (TATOLI) – Fundu Nasaun Unida ba Labarik (UNICEF) hamutuk ho Department of Foreign Affairs and Trade (DFAT) entrega ekipamentu suprimentu ba Banku Sangue ho unidade 70 ba Ministériu Saúde (MS) iha Hospitál Nasionál Guido Valadares (HNGV).
“Serimónia entrega ekipamentu no suprimentu Banku Sangue nian ba Ministériu Saúde, atu tulun no asegura katak Timor-Leste iha servisu ne’ebé ho kualidade iha unidade banku sangue hodi suporta atendimentu saúde ba pasiente sira bainhira iha nesesidade”, Reprezentante Adjunta UNICEF iha Timor-Leste Ainhoa Jaureguibeitia, dehan liuhosi nia diskursu iha salaun HNGV ohin.
Nia dehan, ekipamentu ne’ebe ohin entrega ba banku sangue mak suprimentu sira hanesan Platelet Incubator Unidade rua, Centrigue BT20A Unidade hitu, Haemoglobin Test Complete Unidade sanulu, Terumo Wafer TSCD SC W017 Unidade Lima-nulu, Ultra-low temperature freezer Unidade ida.
“Fornesimentu hirak-ne’e nu’udar parte ida husi kompromisu boot ida-ne’ebé UNICEF iha atu apoia Ministériu Saúde hodi harii kapasidade lojístika ne’ebé apropriadu iha nivél nasionál no sub-nasionál no atu asegura katak iha dezenvolvimentu kapasidade umana ba pesoál saúde sira, tékniku no ekipa monitorizasaun sira”, nia esplika.
Iha fatin hanesan, Vise Ministru Saúde Bonifacio Maucoli dos Reis, agradese ba reprezentante UNICEF no DFAT ne’ebé entrega ekipamentu no abastesimentu Banku sangue ba HNGV.
“Nu’udar membru husi VIII Governu Konstitusional, dala ida-tan hakarak atu espressa ami-nia sentidu profundu ba apoiu no kooperasaun kontinu ne’ebé fornese husi Governu no Povo Australiano liuhosi Embaixadór no DFAT no UNICEF. Imi-nia apoiu nu’udar sentidu solidariedade atu haforsa, hametin no mellora ami-nia sistema nasionál saúde ho objetivu atu hadia komunidade Timor-Leste nia saúde no moris di’ak iha nivél nasionál, munisipál, postu adminstrativu, suco no aldeia, ikus liu maka komunidade no família ida idak, partikularmente fortalese servisu kuidadu banku sangue ba HNGV”, Bonifacio Maucoli afirma.
Nia deklara, MS tau konsiderasaun no rekoñese katak kolaborasaun no kooperasaun mútua ho parseiru dezenvolvimentu, parte interesadu ajénsia nasaun unida, ajénsia doadores mak pertinente tebes atu alkansa vizaun, misaun no meta ne’ebé define tiha ona iha Planu Estratéjiku Dezenvolvimentu Nasional iha Setór Saúde edisaun daruak nian tinan 2020 – 2030.
Planu Estratéjiku Nasionál Setór Saúde haktuir ona Motto, Populasaun Timor-Leste Saudavel iha Timor-Leste ida ne’ebé Saudavel no mós Programa VIII Governu Konstitusionál iha kompromisu atu mellora prestasaun no asisténsia kuidadu saúde ba iha territóriu laran tomak, ho espesiál atensaun ba área remota no kamada populasaun ne’ebé desfavoresidu, tuir prinsípiu inkluzaun, ekuidade, efisiénsia no kualidade ba ema hotu. Maske ita iha banku sangue maibé sei kuran tebes ekipamentus no abastesimentu ba raan”, nia rekoñese.
Nia husu ba profisionál saúde iha HNGV no unidade banku sangue tomak, Hospitál Nasionál Guido Valadares hetan apoiu ekipamentu sira-ne’e. Espera katak ho fasilidade sira-ne’ebé iha, ita boot sira bele hakmaan imi-nia prestasaun kuidadu saúde ospitál, espesialmente iha situasaun krítiku no emerjénsia ho fiar-an, dignu no profisionalismu liután. Maibé iha parte seluk presiza mós tau-matan, kuida no halo manutensaun regular no didi’ak ba ekipamentus sira-ne’e, nune’e bele utiliza iha tempu naruk nia laran ba pasiente sira. Ho Raan turuk ida, ita bele salva ema ida nia vida.
Diretór Ezekutivu interinu HNGV Jony Fracisco do Santo da Silva, agardese ba parseiru sira ne’ebé nafatin apoiu ekipamentu suprimentu ba banku sangue hodi fasilita servisu médiku nian ba públiku.
“Ami agradese ba parseiru UNICEF no DFAT ne’ebé apoiu ekipamentu ida ne’e atu ajuda ami nia servisu ba iha banku sangue hodi fasilita servisu ne’ebé mak ami halo ba paisnete sira”, nia konklui.
Jornalista : Felicidade Ximenes
Editór : Zezito Silva
