ERMERA, 30 abril 2023 (TATOLI) – Partidu istóriku FRETILIN, iha ninia kampaña polítika iha munisípiu Ermera hato’o katak hasa’e formasaun rekursu umanu iha área profisionál no vokasionál importante ba dezenvolvimentu nasionál.
Sekretáriu jerál partidu istóriku, Mari Alkatiri, hateten, formasaun rekursu umanu la’ós de’it ba lisensiatura, mestradu no doutoramentu.
“Husi 45% to 50% ema ne’ebé mak serbisu ba dezenvolvimentu ne’e iha diploma de’it, ou kursu profisionál no vokasionál de’it. Rai iha ne’ebé de’it presiza ida ne’e,” Alkatiri hato’o iha ninia intervensaun durante kampaña iha Kampu Futebol, Glenu-Ermera, domingu ne’e.
Líder timoroan ne’e subliña katak formasaun profisionál no vokasionál importante tebes tanba laiha enjiñeiru ida mak substitui karpinteiru ida hodi halo serbisu, no laiha enjiñeiru ida mak bele substitui pedreiru ida hodi bele hada fatuk.
“Tanba ne’e mak formasaun ho edukasaun tenke la’o hamutuk. Rua ne’e lao hamutuk ona, entaun ita tenke haree ema na’in hira mak atu serbisu iha tinan ida nia laran, bainhira mak atu serbisu iha tinan rua nia laran, no na’in hira mak atu serbisu iha tinan tolu nia laran. Ne’e sei tama hotu iha programa IX Governu nian,” Alkatiri esplika.
Nia dehan, formasaun profesionál no vokasionál integra ona iha Vizaun Integrada Dezenvolvimentu.
“Se ema hotu ba hasai S1, S2, S3, ha’u fiar katak ema husi rai-li’ur mak sei mai harii uma hanesan akontentese agora. Karpinteiru barak mak mai husi rai-li’ur, pedreiru mós mai husi rai-li’ur, no mestre de obra mós mai husi-li’ur,” Líder partidu FRETILIN ne’e akresenta.
Nia dehan, tanba ne’e mak FRETILIN mai ho ninia vizaun katak tenke halo formasaun kompleta ba povu. “Ita tenke hari kondisaun iha rai-laran para ema hetan serbisu. Ita iha kapasaidade atu fó formasaun ba joven sira atu nune’e bainhira sira ba li’ur bele hetan serbisu ida ke di’ak. Ida ne’e sei tama iha programa formasaun no treinamentu,” Alkatiri tenik.
Sekretáriu jerál partidu istóriku FRETILIN, Mari Alkatiri, saliente katak joven sira-nia papél mak lori prosesu dezenvolvimentu ekonómiku ba oin ho ekonomia ida ne’ebé produtiva tebes no inkluzivu tanba ida ne’e mak joven sira-nia funsaun.
Notísia relevante:Foku FRETILIN ba Ermera, Dezenvolvimentu Kafé Hibridu – Dezenvolvimentu estrada
Jornalista : Filomeno Martins
Editora : Nelia Borges
