Komísiu FRETILIN iha Maliana, PNTL halo apreensaun ba motorizada tolu
MALIANA, 01 maiu 2023 (TATOLI)-Polísia Nasionál Timor-Leste (PNTL), komandu munisípiu Bobonaro, halo apreensaun ba motorizada hamutuk unidade tolu ne’ebé xefe suku no funsionáriu sira utiliza patisipa kampaña partidu Frente Revolusionária Timor-Leste Independente (FRETILIN) ho tipu komísiu futeból Maliana.
Kampaña partidu FRETILIN nian hala’o iha loron 29 fulan-abríl liubá.
Komandate PNTL munisípiu Bobonaro, Superintendente Xefe Antoninho Mauluta, esplika motorizada estadu hirak-ne’e deteta hosi ekipa Komisaun Nasionál Eleisaun (CNE, sigla portugés), hafoin relata ba Polísia hodi halo apreensaun.
Notísia relevante: FRETILIN sei hatuur arte-marsiál sai protetór ba Povu
“Ita prende (halo apreensaun) ba motorizada tolu ne’e tanba motorizada governu nian, balun mestri no balun xefe suku nian, tuir informasaun CNE fó mai katak motorizada ne’e para iha kampu ninin, maske la tama liu kampu laran, maibé momentu ne’e área ne’e maioria militante FRETILIN nian okupa hotu. Ida-ne’e mak CNE deskonfia motorizada ne’e sira mai kampaña,” Mauluta informa ba Jornalista sira, iha Maliana, segunda ne’e.
Tuir planu komandu PNTL Bobonaro nian katak, loron tersa, 02 maiu ne’e xefe suku no funsionáriu sira-ne’ebé utiliza motorizada tolu ne’e sei presta deklarasaun ba Polísia.
“Ita prosesu normál, tuir buat-ne’ebé iha liuliu iha krime, motorizada tolu ne’e depois prosesu, ita haree tanba ida ita dehan sira-ne’e dezobidénsia, ida ita haree fali oras ne’e mós ita kampaña iha dekretu lei balun bandu, depois ita-nia Lei mós bandu. Ida-ne’e mak ita sei hare, maibé ita haree nia prosesu mak sei hatudu nia rezultadu,” nia katak.
Iha momentu hanesan, Polísia mós detetta motor xapa (G) ida iha mini-kampaña CNRT ne’ebé hala’o iha suku Tapo-Memo.
“Ita deteta motorizada ne’e ninia xapa de’it mak seidauk troka, motorizada ne’e xefe suku tuan nian ne’ebé sei uza nafatin xapa governu, depois motorizada ne’e intrega fali ba na’in,”Mauluta akresenta.
Enkuantu antese ne’e autoridade munisípiu Bobonaro no instuitisaun relevante sira forma ekipa Task Force ida atu tau matan ba patrimóniu estadu ne’ebé funsionariu sira utiliza partisipa kampaña eleitorál.
Notísia relevante: PNTL Bobonaro halo apreensaun ba motorizada-karreta 30 iha Holsa
Jornalista: Sergio da Cruz
Editór: Evaristo Soares Martins
