Espesialista husu inan feton ezamina susun atu bele deteta sedu moras kankru
DILI,03 maiu 2023 (TATOLI) – Espesialista sirujiaun Jerál iha Hospitál Nasionál Guido Valadares (HNGV ) Raimundo do Santos, husu ba inan sira atu nafatin halo ezaminasaun ba susun atu bele halo deteta sedu bainhira iha moras kankru susun.
“Ha’u husu ba inan feton sira no mós inan isin rua, ne’ebé mak atu konsulta iha fasilidade saúde hodi hatene bebé nia kondisaun, aproveita mós halo ezaminasaun ba susun atu hatene kona-ba kankru susun, karik ida ne’e mak médiku sira deteta halo kedas intervensaun no refere ba espesialista sirujiaun sira atu halo evaluasaun liután”, Raimundo do Santos informa iha edifísiu TATOLI.
Nia dehan, dalabarak ema ne’ebé afeta kankru susun mai husi jenétiku mak barak, liuliu avo ka inan iha nia istória katak moras ne’e iha sira nia família, susar atu kura entaun ida ne’e mak akontese iha Timor-Leste.
Tanba ne’e, husu ba inan feton sira bainhira hetan kafuak iha susun no sinal ne’ebé mak mosu iha susun, atu sai kankru mak susun matan, hanesan sabraka kulit no susun musan tama ba laran, ida ne’e bele mai lalais ona hodi halo tratamentu iha fasilidade saúde sira ne’ebé besik, médiku sira halo intervensaun sedu.
“Ha’u nia mensajem ba inan feton sira tantu klosan no kaben na’in katak bainhira mosu moras kankru susun ba uluk fasilidade saúde atu médiku sira haree no fó tratamentu, labele ba uluk aimoruk tardisionál”, nia sujere.
Nia dehan, kona-ba ekipamentu médiku, nia dehan seidauk sufisiente tanba ne’e husu ba Governu kontinua apoiu atu halo tratamentu iha rai laran tanba dalabarak kankru susun durante ne’e halo transferénsia ba rai liur hodi hetan kemoterapia.
“Médiku sirurjiaun, daudaun ne’e iha na’in sia, mesak timoroan no ita-nia maluk balun sei ba kontinua estudu depois tinan haat tan mai sira fila bele mai apoiu tan servisu ida ne’e iha ita-nia rai laran”, nia konklui.
Husi tinan 2015 to’o 2022, kazu kankru susun ne’ebé afeta ba inan feton sira hamutuk 460, husi númeru ne’e 80% mak avansadu hafoin mai halo tratamentu iha fasilidade saúde sira.
Jornalista : Felicidade Ximenes
Editór : Zezito Silva
