DILI, 03 maiu 2023 (TATOLI) – Espesialista Sirurjiaun Jerál iha Hospitál Nasionál Guido Valadares (HNGV ) Raimundo do Santos, hateten hahan lataria ne’ebé importa mai Timor-Leste kontribui ba moras kankru susun.
“Bainhira ko’alia kona-ba hahan sira, ita haree lataria ne’ebé mak importa mai ita-nia rain, ita hahú konsmu tanba hahan pronto ona mak mai, ita lahatene sosis no sorisu ne’e deut dodok tiha mak mai maibé ita lahatene, entaun hahan ne’e bele kontribui ba moras kankru susun”, Raimundo do Santos dehan ba TATOLI bainhira halo entervista eskluziva iha edifísiu TATOLI.IP farol, horseik.
Nia informa, durante ne’e ema konsumu hahan lataria barak maibé nia impaktu ba saúde mós makas tebes.
“Tanba ne’e mak atu han hahan sira ne’e ho kuidadu no aihan sira ne’e importadu mai la’os ita mak halo rasik entaun atu prevene ida ne’e, di’ak liu mak han produtu lokál sira hodi labele hamosu moras sira”, nia afirma.
Nia esplika, fatór seluk kontribui ba moras kankru susun mak ba ema sira ne’ebé mak bokur liu, ida ne’e mós bele hamosu moras estrogen ba inan feton sira.
“Atu redúz moras kankru susun mak tenke hamenus bokur no mós redúz konsumu tua tanba tua mós bele kontribui ba kankru hotuhotu iha ita-nia isin, hodi estraga ita-nia sélula hotu iha ita-nia isin”, nia konklui.
Jornalista : Felicidade Ximenes
Editór : Zezito Silva
