DILI, 05 maiu 2023 (TATOLI) – Ministériu Edukasaun, Juventude no Desportu (MEJD) sei bolu operadora telekomunikasaun Telkomcel no Telemor hodi husu kona-ba rezultadu instalasaun internét iha eskola sira.
Diretór-Jerál Planu Polítika no Inkluzaun, Raimundo José Neto, hatete bolu operadora rua ne’e ligadu ho preokupasaun hosi Diretór Eskola Bázika Central (EBC) Bidau-Akadiru-hun kona-ba instalasaun liña internét ne’ebé seidauk realiza iha eskola refere.
Diretór Raimundo Neto relata katak informasaun ne’ebé sira simu hosi operadora katak instala ona internét iha EBC Bidau Akadiru-hun, nune’e sei konfirma ho Diresaun Teknolojia Rekursu Pedagójiku MEJD nian atu hetan informasaun klara ba asuntu ne’e, tanba diresaun refere mak halo kontaktu diretamente ho empreza rua ne’e hodi hatene rezultadu serbisu kona-ba progresu instalasaun internét iha eskola sira.
“Ami-nia devér mak sei bolu kompañia sira ne’e, tanba dalaruma serbisu barak, ami lakon tiha informasaun, entaun bainhira relatóriu sira ne’e tama la halo konfirmasaun. Maibé ami mós husu ba parte eskola se bele hato’o mós relatóriu pur eskritu mai ami atu nune’e ami bele halo verifikasaun”, nia sujere.
Kona-ba servisu instalasaun liña internet ne’ebé operadora rua hala’o daudaun ne’e liuhosi konkursu públiku ne’ebé ministériu loke ba empreza tolu hanesan Timor Telecom, Telemor no Telkomcel, maibé ministériu hili de’it rua tanba Timor Telecom nia kustu boot liu.
“Ministériu deside hili operodora rua ne’e hodi asume responsabilidade hodi instala internét iha eskola sira iha territóriu no ikus mai mosu mós hanoin di’ak ida hosi Telemor katak sira bele apoia instalasaun gratuita iha eskola sira iha Dili. Nune’e, dalaruma tanba instalasaun barak liu, parese iha eskola balun bele hakat liu tiha. Tanba ne’e, Ministériu sei konfirma karik seidauk instala husu sira atubele aselera”.
Nia salienta katak daudaun iha mós relatóriu adisionál ne’ebé tama ona hatete katak hahú iha fevereiru liubá instalasaun liña internét ba eskola iha territóriu sei falta de’it EBC 14, inklui liña eletrisidade tanba eskola sira ne’e ninia kondisaun terrenu iha liu área ne’ebé kle’an no labele asesu ba rede.
“Ha’u la lembra eskola sira ne’e iha fatin ne’ebé de’it. Dalaruma iha Dili laran balun mós seidauk hetan internét ida maka EBC Bidau. Ne’e mós ita seidauk hatene”, realsa.
Notísia relevante: Instalasaun liña internet kuaze kobre eskola iha territóriu nasionál
Jornalista: Tomé Amado
Editora: Maria Auxiliadora
