ERMERA, 05 maiu 2023 (TATOLI) – Partidu Assosiasaun Populár Monárkia (APMT), promote sei fó prioridade hodi konstrui Estrada diresaun Gleno-Atsabe bainhira povu fó fiar lidera IX Governu.
Kompromisiu eleitorál ne’e hato’o durante kampaña polítika APMT iha Postu administrativu Atsabe, Munisípiu Ermera.
“Programa APMT nian ne’ebé mak ohin ita hato’o iha Atsabe mak ne’e, ami foka liu ba infraestrutura liu-liu Estrada diresaun Gleno-Atsabe no Atsabe ba Bobonaro. Ita foku ba Estrada hodi ajuda populasaun sira lori sira-nia produtu lokál ba kapitál munisípiu no nasionál,” Vise Koordenadór APMT Munisípiu Ermera, Benedito de Araújo Soares ba Tatoli, sesta ne’e.
Nia énfaze katak, Estrada diresaun Gleno-Atsabe iha ona kondisaun ne’ebé mak grave ona no presiza tau atensaun sériu.
“Estrada ne’e halo komunidade sira atu lori sira-nia produtu ba fa’an iha merkadu munisípiu no nasionál maibé sira hasoru difikuldade bo’ot tebes mak dalan. Entaun povu atu lori sira-nia produtu ba fa’an ne’e susar tebes,” Benedito akresenta.
Líder partidu ne’e dehan, tanba ne’e bainhira povu fó fiar, APMT sei relaiza uluk promesa polítika sira ne’ebé mak hato’o ona tanba programa sira ne’e, liu-liu Estrada importante tebes ba povu ki’ik nia moris.
“Entaun, prioridade APMT nian ba munisípiu Ermera mak dalan. Ita foku ba dalan para labele fó risku ba povu nia viajén,” nia haktuir.
Iha kampaña ne’e APMT mós fahe kompromisiu partidu nian kona-ba subsídiu no bolsa estudu ba estudante universitáriu sira hodi hasa’e rekursu umanu iha Timor-Leste.
Jornalista: Filomeno Martins
Editora: Nelia Borges
