DILI, 10 maiu 2023 (TATOLI) – Banku Mundiál iha Timor-Leste apoiu Osijéniu Konsentratór haat ba Ministériu Saúde (MS) atu utiliza iha Hospitál Nasionál Guido Valadares (HNGV) ba kazu krítiku sira.
”Ami ohin entrega ekipamentu medikál osijéniu Konsentratór haat ba Ministériu Saúde atu utiliza iha Hospitál Nasionál Guido Valadares liuliu ba kuidadu krítiku nian”, reprezentante Banku Mundíal iha Timor Leste, Bernard Harbour, informa ba jornalista sira iha Lesidere, ohin.
Nia dehan, ekipamentu ida ne’e sosa durante pandemia Covid-19 nian no haree ba kazu la iha ona, apoiu fila fali ba MS atu uza ba kazu krítiku sira iha HNGV.
“Ekipamentu ne’ebé mak ita sosa ne’e unidade ida ho montane $3 mil, entaun ita hola haat iha momentu ne’eba, agora ita apoiu ba MS atu utiliza iha Hospitál Nasionál Guido Valadares (HNGV)”, nia afirma.
Iha fatin hanesan, Diretór Jerál Servisu Koorporativu iha MS Marcelo Amaral, agradese ba Banku Mundiál ne’ebé mak kontinua apoia ba MS liuliu ba fortalesimentu sistema saúde iha Timor-Leste.
“Ami agradese ba Banku Mundiál ne’ebé apoiu ekipamentu aparelu haat hanesan osijéniu konsentratór no oinsá atu melhora di’ak liután servisu prestasaun iha HNGV”, Marcelo Amaral esplika.
Diretór Ezekutivu HNGV, Alito Soares agradese ba Banku Mundiál ne’ebé apoiu osijéniu konsetratór atu utiliza ba pasiente sira ne’ebé mak krítiku iha HNGV.
“Ekipamentu osiéniu ida ne’e importante tebes tanba ita sei uza ba pasiente sira ne’ebé mak ho problema respiratáriu nian, entaun HNGV sei uza ba iha deparatmentu kuidadu intensivu ne’ebé mak ospitál”, Alito Soares konklui.
Jornalista : Felicidade Ximenes
Editór : Zezito Silva
