Muzeu Memoriál Bononaro provizóriu estabelese iha Biblioteka Edukasaun
MALIANA, 10 maiu 2023 (TATOLI) – Autoridade Munisípiu Bobonaro identifika ona fatin Muzeu Memoriál Munisipál Bobonaro provizóriu sei estabelese iha Biblioteka Servisu Edukasaun Munsipál ne’ebé lokaliza besik Rotunda Maliana, suku Lahomea, postu administrativu Maliana.
Sekretáriu Autoridade Munisípiu Bobonaro, João de Fátima do Carmo, hateten desizaun identifika fatin provizóriu ne’e bazea ba konkordánsia estrutura Konsellu Muzeu Memoriál Munizípiu Bobonaro hodi hein Sentru Nasionál Chega, Insitutu Públiku (CNC,I.P sigla portugés) atu mai haree kondisaun infraestrutura ne’e inklui fasilidade sira seluk.
Notísia relevante: CNC sei estabelese muzeu memoriál munisipál Bobonaro
“Parte autoridade liuliu Governu, iha nível munisípiu entre terra propriedade atu estabelese hela temporariamente ba fatin ne’ebé atu sai hanesan muzeu memoriál iha munisípiu Bobonaro, ne’e mak identifika ona. Ita sei tau hamutuk iha Biblioteka Edukasaun nia, atu nune’e publiku no ita nia oan sira atu haree no turista sira bele asesu,” nia informa ba jornalista sira, iha Maliana, kuarta ne’e.
Daudaun ne’e Diresaun Terra no Propriedade mós hahú identifika ona rai estadu sira iha kapitál Maliana nune’e CNC bele halo ona kontrusaun ba muzeu memoriál Bobonaro ne’ebé tuir planu sei hahú iha tinan ne’e.
“Iha tempu badak ekipa CNC sei tún fila fali mai, atu haree kondisaun iha terrenu, fatin ne’e agora sei iha prosesu ka iha proposta nia laran,” Joao do Carmo dehan.
Obejtivu hosi estabelesimentu muzeu memoriál ne’e atu dsiponibiliza no prezerva dokumentu istóriku sira kona-bá violasaun direitu umanu, hahú hosi períodu 1974-1999, no fasilita informasaun kona-bá istória pasadu.
Nune’e mos sai sentru aprendizajen konabá pás, justisa no direitu umanu, nu’udar referénsia istórika ba peskizadór sira no sai fatin ba reflesaun.
Notísia relevante: CNC, I.P sei apoiu uma ba sobrevivente haat
Jornalista: Sergio da Cruz
Editór: Evaristo Soares Martins
