MALIANA, 11 maiu 2023 (TATOLI) – Koordenadór Eletrisidade Timor-Leste, Empreza Públika, munisípiu Bobonaro, Mário de Jesus, klarifika ba publiku katak ahi lakan mate iha postu administrativu Bobonaro no Lolotoe durante semana ida ne’e tanba kauza hosi natureza.
Notísia relevante: EDTL Bobonaro preparadu fornese enérjia elétrika ba sentru votasaun
“Ahi iha parte postu rua hanesan Bobonaro no Lolotoe, ne’ebé mak agora daudaun mate lakan, ha’u hakarak klarifika liuliu sira-ne’ebé uza fider (1), la’ós tékniku sira mak hamate, maibé agora tempu udan no anin-boot halo ita-nia kabu media-tensaun monu tún ba rai no poste média no baixa-tensaun balun monu,” nia informa ba jornalista sira, iha Maliana, kinta ne’e.
Nia subliña, EDTL hanesan Empreza Públika ne’ebé presiza atu hetan reseita nune’e mákina iha sentrál elétrika Hera no Betano bele funsiona normál hodi fornese enérjia elétrika ba kliente sira.
Maibe ekipa Task-Force EDTL munisípiu Bobonaro sei kontinua esforsu au normaliza hikas estragus hirak-ne’e.
“Agora dadaun sei atende hela servisu iha liña komunitária ne’ebé mak la’o hela iha Balibo, tanba loron lima hotu ona, depois mak haree avaria sira iha postu Bobonaro no Lolotoe,” Mario dehan.
Nia husu kliente sira atu hein ho pasiénsia oituan no bainhira ahi lakan mate desliga hotu sasán eletrónika sria.
“Ahi ne’e mate lakan afeta mós ba sira-nia sasan eletróniku hanesan jeleira, televizaun no seluk tán, tanba ne’e favór desliga tiha nune’e sasán sira-ne’e labele aat,” Jerente ne’e apela.
Entretantu totál kliente EDTL,E.P iha munisípiu Bobonaro hamutuk uma-kain 16,991 ho kategoria doméstika, komérsiu no sosiál.
Notísia relevante: EDTL Bobonaro garante eletrisidade lakan 24 oras iha loron eleisaun
Jornalista : Sérgio da Cruz
Editór : Evaristo Soares Martins
