EKONOMIA, BOBONARO, HEADLINE, MUNISÍPIU

AMRT – Autoridade Bobonaro diskute atu dezeña futuru jardín Nino Konis Santana

AMRT – Autoridade Bobonaro diskute atu dezeña futuru jardín Nino Konis Santana

Saudozu Nino Konis Santana.

CAILACO, 24 maiu 2023 (TATOLI) – Arkivu Muzeu no Rezisténsia Timorense (AMRT), Institutu Públiku (AMRT,E.P), kuarta ne’e hala’o diálogu ho autoridade munisípiu Bobonaro, veteranu, lia-na’in sira hodi diskute kona-bá futuru pakote atu dezeña jardín eroi Nino Konis Santana, ne’ebé lokaliza iha foho Loe-Laco, suku Atudara, postu administrativu Cailaco.

Diretór ezekutivu AMRT, Antoninho Baptista Alves, esplika, diskusaun ne’e atu rona ideia hosi parte autoridade lokál no veteran no komunidade sira kona-bá pakote dezeñu integradu jardín ne’ebé submete ba AMRT iha tinan hirak liubá.

Konseitu ba dezeñu integradu ne’e ho objetivu prinsipál sira-ne’ebé kontempla ho jardín refere mak hanesan monumentu saudozo Nino Konis Santana, pixina, kampu multi-funsaun, otél, kafetaria, sentru saúde, eskada no estrada espasu rua (dua jalur).

Maibé hafoin AMRT lansa konsulta públiku ho konseitu dezeñu ne’e kuaze dala-haat ho tékniku hosi espesialista sira-ne’ebé kompetente iha área floresta, ambiente, natureza no área protejida.

Nune’e, Autoridade Nasionál Lisensiamentu Ambientál  (ANLA) no espesialista sira fó ona paresér tékniku atu redús konteúdu sira-ne’ebé mak iha impaktu maka’as ba sobu rai iha área protejida.

Notísia relevante: Parke Nino Konis Santana Sei Nomea Nu’udar Patrimóniu Mundiál

“Ita mai halo diálogu iha-ne’e atu buka alternativa no solusaun, ne’e mak bele fó espasu ruma ne’ebé iha rai hún ne’e, besik komunidade sira-ne’e atubele halo instalasaun ba pakote sira-ne’e iha alterasaun balu bele muda mai,” nia ko’alia iha iha Aitutu, suku Raiheu.

Objetivu hosi estabelesimentu ne’e jardín refere atu asegura halo prezervasaun espasu istóriku hosi saudozo Ninos Konis Santana inklui istória rejiaun kuatru ninian no sei sai mós sítiu turizmu istóriku, inklui sai fatin aprendizajen ba estudante sira no ema estranjeiru sira.

“Ita mós bele kria kampu traballu ba komunidade no ita-nia obetivu prinsipál mak ho espasu ida-ne’e kuandu mellora didi’ak bele hetan reseita direita no indireita partisipasaun ekonómika ne’ebé ba ita-nia komunidade rasik,” nia akresenta.

Prezidente Autoridade Munisípiu Bobonaro, Ernesto de Oliveira Barreto, apela ba autoridade lokál no komunidade sira hotu atu kontribui ba prosesu dezenvolvimentu jardín eroi refere.

“Ha’u hanoin ne’e onra boot mai ita, tanba jardín ida-ne’e atu marka istória ba ita Rejiaun IV iha munisípiu Bobonaro katak funu ida-ne’e ita moos kontribui natoon,” nia dehan.

Veteranu Jacinto Viegas Viçente ‘Roque’, louva ho inisiativa ne’e no sei tuur hamutuk kria konsetu ba jardín ne’e atu tranforma fatin ne’e sai sítiu istóriku nune’e istória labele lakon jerasaun ba jerasaun.

“Ami apoia tebes atu harii jardín ida-ne’e, tanba alende ita konta istória, aban bainrua istória ne’e sei lakon kuandu ema inventa istória, maibé kuandu iha ema bele konta istória haree ba realidade ne’ebé mak oras ne’e ita harii,” nia katak.

Enkuantu fatin ne’e hanesan baze kaixa postál ba rezisténsia sira halo funu kontra okupasaun Indonezía. Nune’e mós fatin refere dezde portugés, bei-ala sira mós subar sa’e ba ne’e hodi reziste hasoru ‘malae-mutin’.

“Sira reziste impostu ne’ebé ‘malae-mutin- haruka atu selu, como sira la kumpre sira sa’e ba iha-ne’ebá (foho Loe-Laco), atu harahun sira mós forsa no lurai sira iha munisípiu hotu-hotu mai mak foin harahun,” Roque haktuir.

Notísia relevante: CCLN husu Governu dezenvolve abrigu Nino Koni Santana iha Foho Loe-Lacu

Jornalista   : Sérgio da Cruz

Editór          : Evaristo Soares Martins

iklan
iklan

Leave a Reply

iklan
error: Content is protected !!