MALIANA, 24 maiu 2023 (TATOLI) – Sentru Atendimentu Agríkola Kuda Ulun Bobonaro (CAAKUB), sei sosa hare-kulit tonelada 150 ne’ebé agrikultór sira prodús iha époka dahuluk ba tinan ne’e.
Prezidente CAAKUB, António Barreto da Conceição, esplika, hare-kulit hirak-ne’e sosa hosi grupu agrikultór hamutuk 28 ne’ebé pertense iha postu administrativu Maliana Vila.
Tanba asosiasaun ne’e iha nesesidade atu sosa hare-kulit barak tanba estoke iha armazein Holsa mamuk dezde fulan-dezembru tinan kotuk. Hare-kulit sira ne’ebé planu atu sosa ho presu kada kilograma sentavu $0,40.
Notísia relevante: CAAKUB sei sosa hare-kulit hosi Mole-Anan no Halecou
“Ami enkontru ona ho xefe grupu sira, partisipa mós hosi agro-komérsiu munisípiu, ami planiea tiha ona, ba tinan ida ne’e ami sei sosa agrikultór sira-nia hare-kulit tonelada 150. Karik ami-nia kbiit liu ami bele sosa tán hosi agrikultór sira seluk,” nia informa ba Jornalista sira iha Maliana, kuarta ne’e.
Hafoin sosa, tuir planu hare-kulit hirak-ne’e sei halo prosesamentu iha fulan-juñu nune’e bele responde ba nesesidade merkadu sira iha nasionál no munisipiu inklui Sentru Lojístika Nasionál.
Enkuantu presu ba foos rai ne’ebé CAAKUB distribui ba merkadu, kada kilograma ho folin $1,10 sentavu, saka ida 25 kilograma nia ne’e folin $26,50, kilograma 10 ho folin $11,00, foos ikis 25 kilograma $10.
“Agota ita tetu nia novembru to’o dezembru sira ne’e, ita depende de’it ba merkadu, se kompradór ne’e barak 150 ne’e mós bele la to’o tinan oin, tanba tinan ne’e ita hatama ba CLN foos tonelada 50,” nia akresenta.
Enkuantu agrikultór sira-ne’ebé durante hamahan-aan iha asosiasaun ne’e hamutuk 300-resin, mai hosi suku Lahomea, Ritabou, Raifun, Odomau no Holsa.
Notísia relevante: CAAKUB sei distribui foos tonelada 50 ba Sentru Lojístika Nasionál
Jornalista : Sérgio da Cruz
Editór : Evaristo Soares Martins
