DILI, 25 maiu 2023 (TATOLI) – Xefe Banku Sangue, iha Hospitál Nasionál Guido Valadares (HNGV) Cladio Julio Quintão, dehan estoke ran B menus iha banku sangue.
“Iha fulan maiu ida ne’e ita-nia estoke ran B mak menus iha ita-nia fatin no ba estoke ran sira seluk hanesan A, B, AB no O ita estoke sufisiente”, Cladio Julio Quintão, dehan ba jornalista sira iha nia fatin HNGV, ohin.
Nia dehan, estoke ran ne’ebé la iha, halo ona koordenasaun ho instituisaun relevante sira no mós estudante sira atu halo doasaun ran, ida ne’e hodi apoiu ba ema ne’ebé mak presiza ran iha HNGV.
“Estoke ne’ebé agora la iha daudaun ne’e ami sei lao hela ba instituisaun sira atu donor ran mai iha ne’e, maibé durante ami donor pasiente barak mak presiza liuliu tipu ran B mak sa’e makas, entaun agora estoke menus tebes no seidauk iha kontatu ruma husi instituisaun sira atu donor, entaun ami garane husi família sira de’it”, nia afirma.
Nia esplika, Banku Sangue iha fulan juñu, iha komunidade Filipina no husi ministériu relevante sira atu mai halo doasaun ran iha ne’e.
“Iha fulan juñu mak ita-nia komunidade Filipina no husi Ministériu Asuntu Parlamentar no Komunikasaun Sosiál (MAPKOMS) fó ona informasaun katak sira sei koordena ho liña Ministeriál sira atu halo doasaun ran hodi selebra loron funsaun públika no ami mós servisu hamutuk ho Cruz Vermelha Timor-Leste (CVTL), hodi halo aprosimasaun ba estudante sira husi Institutu Siénsia Saúde no estudante Sols atu halo mós doasaun ran ba banku sangue atu ajuda ba ema ne’ebé mak presiza ran”, nia hateten.
Estoke ran iha Banku Sangue HNGV A+ iha hitu, husi família hamutuk 16, B+ iha Banku Sangue la iha, husi família sia, AB+ iha Banku Sangue sia, husi família 10 no O+ iha Banku Sangue 20 no husi família 32.
Jornalista : Felicidade Ximenes
Editór : Zezito Silva
