Ministériu Públiku aprezenta ona kazu baku joven iha Malilait ba TDS
MALIANA, 25 maiu 2023 (TATOLI) – Komandante PNTL Munisípiu Bobonaro, Superintedente Xefe Antoninho Mauluta, fó-sai katak, kazu líder partidu polítiku atuál Vise Ministru Administrasaun Estatál (MAE), Lino de Jesus Torrezão, baku joven ida iha suku Mali-lait, postu administrativu Bobonaro, Ministériu Públiku remesa ona prosesu ba Tribunál Distritál Suai (TDS).
Notísia relevante: Kazu baku joven iha Malilait, PNTL submete ona ba Ministériu Públiku
“Kazu membru governu halo agressaun fíziku hasoru joven ne’e, horisehik ita-nia Ministériu Públiku Maliana remesa ona ba iha Tribunál Distritál Suai,” nia informa ba jornalista sira, iha Maliana, kinta ne’e.
Kazu ne’e akontese iha loron-kinta, 19 maiu 2023, maizumenus tuku 02:00, iha serimónia haan hamutuk ho família, ne’ebé prienxe ho atividade animasaun dansa to’o 19/05, vítima mós partisipa, tanba de’it hatudu liman fuan rua hetan kedas tuku hosi líder polítiku ne’e to’o joven ne’e nia inus raan.
Entretantu tuir deklarasaun membru governu ne’e ne’ebé antes ne’e fó-sai ba públiku, rekoñese katak nia basa duni joven ne’e, tanba hasai liafuan má no desrespeita, no asaun ne’ebé nia halo la rezulta raan fakar, maibé nia rasik mak basa to’o ibun raan tanba sei iha hela relasaun família.
Notísia relevante: PNTL Bobonaro firme asegura kampaña eleitorál
Jornalista : Sérgio da Cruz
Editór : Evaristo Soares Martins
