DILI, 31 maiu 2023 (TATOLI)—Prezidente Konfederasaun Nasionál Kooperativa Timor-Leste (CNCTL,sigla portugés) no atuál Sekretáriu Estadu Kooperativa, Elizário Ferreira, sei sai oradór ba semináriu internasionál iha Brazíl.
“Sente orgullu bainhira simu konvite tanba ida-ne’e hanesan onra ida, liu-liu ba movimentu kooperativa iha Timor-Leste. Vantajen ne’ebé ita sei hetan iha semináriu internasionál mak fó oportunidade ba ita atu promove ezisténsia kooperativa Timor-Leste ba mundu no mobiliza apoiu parseiru internasionál nian mai ita-nia movimentu kooperativa. Tanba ne’e ha’u sei ko’alia kona-ba dezenvolvimentu kooperativa ekonomia sosiál iha nível Ázia,” Elizário Ferreira informa ba Agência Tatoli, via telefónika, tersa ne’e.
Semináriu internasionál ne’e sei hahú iha loron 17 to’o 19 jullu 2023, ne’ebé realiza tanba Organizasaun Kooperativa Brazíl serbisu hamutuk ho Departamentu Asuntu Ekonómiku no Sosiál Nasaun Unida (UNDESA, sigla portugés).
Notísia relevante : SEKoop: “lei ekonomia sosiál fó kbiit kooperativa sai sentru dezenvolvimentu”
Iha novembru tinan kotuk liubá, liuhosi vídeo konferénsia ho Komunidade País ho Lian Portugés (CPLP, sigla portugés), ikus mai nasaun Brazíl, Portugal, Angola, Guine Bisau no Mocambique haruka proposta mai Sekretaria Estadu Kooperativa (SEKoop) hodi harii parseria ba movimentu kooperativa liuhosi SEKoop no ba Federasaun Kooperativa Kréditu Hanai Malu (FCCHM, sigla portugés).
“Apoiu mai hosi nasaun sira ne’ebé ha’u temi, agora iha prosesu liu-liu ba kooperativa kréditu dezenvolve programa dijitalizasaun no formasaun tuir área temátika ida-idak nian,” nia akresenta.
Daudaun membru kooperativa iha Timor-Leste hamutuk 120.000 ho kapitál milliaun $38 resin.
Jornalista : Arminda Fonseca
Editora : Julia Chatarina
