MOP presiza rezolve komunidade afetadu projetu estrada Maliana
MALIANA, 01 juñu 2023 (TATOLI)-Prezidente Autoride Munisipiu (PAM) Bobonaro, Ernesto de Oliveira Barreto, husu ba Ministériu Obra Públika atu rezolve problema komunidade ne’ebé afetadu hosi projetu reablitasaun estrada urbana Maliana pakote II ho modelu pista rua.
Notísia relevante: ANLA emite ona lisensa ambientál ba projetu estrada Maliana
“Molok hahú konstrusaun ne’ebé ita sei implementa iha tempu badak nia laran, ha’u husu ba Governu atubele buka solusaun ne’ebé mais adekuadu liuhosi indemnizasaun ne’ebé justu no kooresponde ba sira atu hetan sira-nia direitu,” nia hateten iha diskursu ba serimónia ne’ebé realiza kinta ne’e.
Tuir nia, kapitál munisípiu Bobonaro hanesan fatin ida-ne’ebé tetuk no luan ho nia komunidade barak mak hela iha sidade kapitál munisípiu no besik kedas estrada ibun hosi parte karuk no loos.
Kapitál Maliana mós iha área potensiál ba produsaun agrikultura no área potensiál sira seluk ne’ebé fó kbiit ba povu nia moris.
“Iha projetu ne’e sira sei sakirifka sira nia sasán bens no movel sira hanesan rai, uma no rai ba produsaun agrikultór, plantasaun, moru, jardín no sasán sira seluk ligá ho rai,” Ernesto afirma.
Hatán ba preokupasaun ne’e, Ministru Obras Públika, Abel Pires, esklarese daudaun ne’e ekipa tékniku sira halo hela levantamentu dadus ba komunidade afetadu sira.
“Ne’e hanesan prosesu normál, orsamentu ba ida-ne’e ami prevene ona dezde kedas tinan kotuk, ha’u hanoin laiha problema tanba ita iha esperiénsia barak ona ba estrada Laga-Baguia ho estrada Quelicai, Tibar, aeroportu rasik, nia orsmentu depende ba komunidade afetadu sira,” nia konfirma
Notísia relevante: Governu hatuur fatuk dahuluk ba projetu estrada urbana Maliana
Jornalista: Sérgio da Cruz
Editór: Evaristo Soares Martins
