Abitante 2000 iha Oé-Cusse seidauk simu apoia foos ba programa food for work
OÉ-CUSSE, 06 juñu 2023 (TATOLI) – Abitante 2000-resin iha Rejiaun Administrativa Espesiál Oé-Cusse (RAEOA), seidauk simu apoia foos hosi Autoridade RAEOA ba programa food fork work.
Notísia relevante: Autoridade RAEOA lansa programa “Food for Work” iha área protejida Nitibe
Programa food fork work ne’e, Autoridade RAEOA implementa iha tinan 2021, ho objetivu enkoraja komunidade sira hodi hala’o serbisu voluntária, hadi’a estrada, hamoos bee-matan ho halo lutu haleu, no hadi’a eskola, maibé Autoridade prepara apoia hahán kada uma-kain hetan foos saka ida.
Maibé bainhira komunidade finaliza atividade hirak-ne’e iha 2021, Autoridade RAEOA seidauk fornese apoia to’o agora tanba estoke foos iha armezein Oé-Cusse, la sufisiente.
Nune’e komunidade sira hosi bairru Noeninen, suku Cunha, sub-rejiaun Pante Makasar husu ba autoridade sira, presiza tau atensaun tanba iha suku hot-hotu seidauk simu apoia kuaze tinan rua ona.
“Iha 2021 ami hahú serbisu hadi’a estrada hosi eis merkadu Tono ba to’o bairu Kiumina, no hamoos duut no valeta sira, distánsia kilómetru 1, tanba autoridade sira mai informa, depois remata servisu sei oferese foos mai ami, kada uma-kain hetan foos saka ida, to’o agora laiha,” abitante Noeninen, Zelia da Cruz, ko’alia iha Oé-Cusse.
Nia hatete, iha bairu Noeninen uma-kain 150 maka hala’o servisu volúntária, iha mumentu ne’ebá maibé to’o agora seidauk iha apoia ruma.
“Ami la’ós ejize apoia, maibé momentu ne’e sira mak mai promete mai ami, agora ami hein tinan rua ona, foin daudaun ami konfirma maibé dehan foos hotu, haruka ami sei hein bainhira foos iha mak oferese ami,” nia konta.
Fatin hanesan, Júlio de Carvallu, reforsa tán, “Ami ba konfirma ho sira-ne’ebé mumentu haruka ami halo servisu ne’e, laiha resposta klaru, ami ba istória malu ho ami, maibé mumentu ne’e sira mak lori karta mai, no haruka ami halo servisu, pois lista naran atu hetan foos,” nia katak.
Hatán ba problema ne’e, Koordenadór Lojístika Armazeinamentu, iha Diresaun Edukasaun Oé-Cusse, Januário Nesi, informa, Autoridade RAEOA seidauk iha kalendariu fiksa atu fornese apoia tanba estoke foos iha armazein la sufisiénte.
“Kona-bá servisu food for work, atu fornese apoia foos ba komunidade tanba halo servisu volúntariamente, hanesan toos, hadi’a estrada no hamos bee-matan sira, iha grupu barak seidauk simu apoia tanba estoke foos iha armazein menus no la sufisiénte atu fó atendimentu,” Januariu Nesi,
Nune’e, nia promete bainhira estoke foun iha, maka Autoridade liuhosi Diresaun Edukasaun sei distribui kada grupu iha suku hot-hotu.
“Lista ne’ebé seidauk simu dezde 2021 to’o agora iha ema na’in-2000 liu, la’ós Noeninen de’it, ida-ne’e inklui serbisu volúntariu hadi’a no halo provizória ba eskola sira, mós seidauk to’o agora seidauk hetan,” nia afirma.
Planu atu aumenta, nia dehan, ida-ne’e, depende ba proposta hosi Autoridade RAEOA liuhosi Sekretária Rejionál ba Asuntu Edukasaun no Solidariedade Sosiál, atu hato’o pédidu ba Ministériu Solidariedade Sosiál no Inkluzaun (MSSI), nune’e bele hetan apoia hosi nasionál.
“Foos ne’ebé iha agora, uitoan de’it, momentu atu apoia ba koléjiu Orfonatu sira, hanesan Dominikana, Fransiscana, Pássabe no Baoknana, maibé ida-ne’e mós foos hosi programa merenda eskolár nian tanba liu, entaun restante ne’e ami uza ba apoia emerjénsia de’it, liu-liu ba dezastre naturál, ka família matebian ruma,” ni katak.
Notísia relevante: Autoridade RAEOA dezenvolve ortikultura liuhosi programa “Food for Work”
Jornalista: Abílio Elo Nini
Editór: Evaristo Soares Martins
