FFTL fasilita formasaun bázika ba treinadór futeból 18 iha Maliana
MALIANA, 07 junu 2023 (TATOLI)-Federasaun Futeból Timor-Leste (FFTL) fasilita formasaun bázika ba treinadór klubu futeból hamutuk na’in-18 iha postu administrativu Maliana, munisípiu Bobonaro ho sertifikadu lisensa (D).
Treinadór hirak-ne’e feto rua no mane na’in-rua hosi Asosiasaun Futeból Munisípiu Bobonaro hanesan mós jogadór antigu no restante hosi klubu ne’ebé eziste iha kapitál Maliana inklui ida hosi klube FC Cruz postu administrativu Cailaco.
Asistente Instrutór, Gaspar Quintao da Silva, hateten tuir loloos formasaun ne’e FTTL planeia atu realiza iha tinan kotuk, maibé tanba pandemia Covid-19 la konsege implementa.
Formasaun ne’e halao durante loron lima, hahú iha segunda loron (05/05) no sei ensera iha loron (09/05) tinan ne’e. Enkuantu atividade ne’e fasilita hosi instrutór Gopalkrihnan Ramasamy hosi Nasaun Malázia ne’ebé iha esperiénsia kuaze tinan 20 ona iha AFC.
Notísia relevante: Árbitru 32 iha Oé-Cusse hetan formasaun téknika hosi FFTL
“Formasaun ida-ne’e hakarak ka lakohi tenke hala’o, ita hakarak eleva kualidade futeból iha rai-laran, se ita hakarak hetan jogadór diak, ita tenke iha mós treinadór di’ak, kualifikadu atu nune’e garante kualidade futeból iha ita-nia rai,” nia informa ba Jornalista sira, iha estádiu Malibaca, Yamato, Soso, Maliana, kuarta ne’e.
Nia dehan, materia ne’ebé aplika ba terinadór sira foka liu ba tékniku, tátika no skill treina atu nune’e sira bele iha koñesimentu natoon hodi ezerse prátika ba jogadór sira durante ezersísiu iha kampu.
Atual diretór Tekniku (FFTL) ne’e haklaken, formasaun ne’e fasilita ba de’it treinadór sira-ne’ebé mak kaer klubu ka minimu kaer sentru formasaun sira iha munisípiu nune’e siénsia ne’ebé hetan bele iha nia kontinuasaun hodi aplika ba jogadór sira.
“Ha’u-nia mensajen mak ne’e husu ba treinadór sira-ne’ebé mak hola parte ona iha kursu lisensa D, C,B atu kontinua prátika, atu nune’e ita bele kadi ita-nia koñsimentu ne’e bele sai di’ak liután, hodi aplika sesaun treinu ida di’ak liu ba ita-nia joagadór sira,” nia apela.
Sekretariu Jerál Asosiasaun Futeból Bobonaro, António Barreto, agradese ba FFTL tanba liuhosi formasaun ne’e bele hakbi’it treinadór sira-nia koñesimentu.
“Ami-nia observasaun treinadór fó treinu ba ita-nia jogadór sira iha postu no klube sira, tanbá nia mai ho naturalmente de’it, agora oinsá mak ita atu uza jogu ho métodu ne’ebé mak ema iha mundiál sira uza,” nia katak.
Jornalista: Sergio da Cruz
Editór: Evaristo Soares Martins
