OÉ-CUSSE 29 maiu 2023 (TATOLI) – Arbitrajén modalidade futeból 11 no futeból salaun hamutuk 32 iha Rejiaun Administrativa Espesiál Oé-Cusse Ambeno (RAEOA) hetan formasaun teoria no prátika nian hosi Federasaun Futeból Timor-Leste (FFTL).
Formasaun ne’e realiza durante loron haat, hahú iha loron sesta 26 fin-de-semana ne’e, no ensera iha segunda ohin, loron 29 maiu 2023.
Diretór Árbitrajén FFTL, Nivio da Costa Fernandes, informa, atividade ne’e nu’udar programa regulár FFTL nian, hodi fasilita formasaun ba asosiasaun sira iha munisípiu hotu-hotu, fokuliu ba teoria no prátika durante loron lima iha kada munisípiu.
“Materia prinsipál iha formasaun ne’e, primeiru ko’alia ba tékniku fokuliu ba regulamentu árbitrajén bainhira lidera kampu, no fitnes ka prátika aplika iha kampu, kuandu ita sai hanesan árbitru ida, tita enki liuhosi teste fizikamente, ida-ne’e mak formasaun loron lima nia laran,” Nivio da Costa Fernandes, ko’alia iha ámbitu enseramentu realiza iha salaun IADE Oé-Cusse, segunda ne’e.
Alende ne’e mós, kritéria atu hetan formasaun árbitrajén, FFTL prioridade ba idade produtiva sira, hahú hosi idade 17 to’o 25, kabe ba modalidade rua, futeból 11 no futeból salaun.
“Tan ne’e ita husu árbitrajén hotu-hotu iha Timor-Leste, sira-ne’ebé hetan ona formasaun persiza aplika, ba sidadaun hotu ne’ebé envolve iha vida desportu, no ikus FFTL sei loke dalan ba siadadaun hotu bele aprende, nune’e ba futuru bele sai árbitrajén ne’ebé mak di’ak iha nasaun Timor-Leste,” nia fó hanoin.
Iha fatin hanesan, Prezidente Assosiasaun Futeból Oé-Cusse (AFO), Arnold Suni, agradese ba FFTL tanba treinamentu ne’e importanta ba árbitrajén no treinadór sira iha Oé-Cusse, atu aumenta koñesimentu la’os hatene de’it hú maibé bele mós hanorin jagadór sira bele komprende regulamentu bola nian iha kampu.
“AFO ne’e sanak hosi FFTL, entaun kada fulan neen kria programa, ida mak formasaun ne’e liliu ba teoria no prátika ba modalidade rua, hosi futeból salaun ema na’in-12 mak partisipa, maibé ida pasa sai arbitrajén iha AFO Oé-Cusse, ne’e hatudu katak selesaun ne’e la’o ho regulamentu, partisipante ne’ebé esforsa ikus hetan valór di’ak atu sai arbitrajén,” nia afirma.
Ba modalidade futeból 11, iha na’in-20 maibé na’in-neen mak pasa hodi sai arbitrajén, selesaun ne’e direita hosi nasionál FFTL hatudu katak, laiha famíliarizmu no nepotízmu, tanba durante formasaun ne’e iha teoria no prátika.
Nune’e, nia enkoraja partisipante sira-ne’ebé laliu selesaun ba arbitrajén, presiza prepara-an ba futuru sei iha tán oportunidade, tanba programa ne’ebé AFO kria kada fulan neen sei loke formasaun sidadaun hotu atu tuir formasaun kona-bá árbitrajén nian, maib’e ho idade tinan 17 to’o 25.
Entretantu, formandu árbitrajén 32 ne’e mai hosi sub-rejiaun haat, Oésilo Pássabe, Nítibe no sub-rejiaun Pante Makasar.
Jornalista: Abílio Elo Nini
Editór : Rafael Ximenes de A. Belo
