PMOPA faze daruak iha Balibo prioritiza setór agrikultura
MALIANA, 17 juñu 2023 (TATOLI) – Implementasaun Programa Mão de Obra Postu Administrativu (PMOPA) faze daruka iha postu administrarivu Balibo, munisípiu Bobonaro, sei tau prioridade ba atividade iha setór agrikuktura nian.
Administradór postu administrativu Balibo, Amilcar Tavares, PMOPA faze dahuluk besik konklui ho nia atvidade sira hanesan limpeza jerál, manutensaun estrada ligasaun hosi aldeia Boro mai estrada nasionál hodi fasilita komunidade sira lori produtu fore-mungu ba merkadu.
Nia konfirma, planu faze daruak nian ne’e bazea ba orientasaun hosi Prezidente Autoridade Munisípiu Bobonaro, Ernesto de Oliveira Barreto, tanba implementasaun faze dahuluk emprega komunidade sira halo atividade limpeza, manutensaun estrada no seluk tán la hetan rendimentu.
Notísia relevante: Bobonaro hetan alokasaun rihun $600 implementa PMOPA
“Iha faze daruak ne’e ami sei halo mudansa nia atividade, tanba ita labele halo de’it estrada, folin laiha, sira iha osan $2,40, iha faze daruak ne’e ita tau atu rekuperasaun ekonomia, ita haruka sira kuda modo, kuda ai-manas ektare ida ka rua ho liis, depois rezultadu hosi produtu ne’e sira ba fa’an osan ne’e fó ba sira,” nia informa ba Tatoli, iha knaar-fatin, segunda ne’e.
Administradór ne’e subliña, programa ne’e sei emprega ema 400 hosi grupu 20 ho durasaun servisu loron 20 ho valór orsamentu kada ema $100.
Autoridade postu ne’e husu ba Governu foun atu kontinua implementa programa refere, tanba liuhosi PMOPA bele redús dezempregu no hadi’ak ekonomia lokál.
“Ha’u-nia haree PMOPA ne’e di’ak tanba halo rekuperasaun ekonomia no loke kampu traballu. Sé di’ak liután tinan-tinan nia la’o hanesan atu loke kampu traballu ba ema sira-ne’e, maibé tenke di’ak liután,” nia katak.
Enkuantu postu administrativu Balibo hetan alokasaun orsamentu hosi autoridade munisípiu Bobonaro hodi implementa PMOPA faze dahuluk no daruak hamutuk rihun $10.
Notísia relevante: Balibo implementa atividade neen iha PMOPA faze dahuluk
Jornalista : Sérgio da Cruz
Editór : Evaristo Soares Martins
