EDTL rezolve hela ahi mate iha Bobonaro-Lolotoe no Atsabe
MALIANA, 22 junu 2023 (TATOLI) – Tékniku hosi Eletrisidade Timor-Leste, Empreza Públika (EDTL,E.P), munisípiu Bobonaro, daudaun ne’e iha hela terrenu hodi rezolve problema ahi mate ne’ebé akontese iha postu administrativu Bobonaro, Lolotoe no postu administratrivu Atsabe, munisípiu Ermera.
Koordenadór EDTL Munisípiu Boobonaro, Mario de Jesus, rekoñese eletrisidade iha postu administrarivu tolu ne’e mate kuaze loron haat ona, hahú hosi segunda (19/06) semana ne’e to’o kinta(22/06) tanba mákina avaria.
Notísia relevante:EDTL Bobonaro la deteta ligasaun ilegál durante sistema falla
“Ami kuaze la’o no ami seidauk hetan, agora ami troka ninia materiál sira-ne’e mós nafatin hela, ohin dadeer ami aranka fila fali hosi bundaran sae ba Hali-Mesak, ahi agora to’o ona iha ne’ebá,” nia informa ba jornalista sira iha Maliana, kinta ne’e.
Hafoin akontese avaria iha segunda ne’e tékniku sira tún kedas ba terrenu buka tuir ninia kauza, maibé presiza lori tempu tanba laiha aparellu modernu ida atu identifika no deteta fatin avaria.
“Ita buka sistema manuál de’it, entaun ami tenke pasa revista hosi ai-riin ba ai-riin, ami tenke hakotu no habadak liña, foin ami bele hatene ninia moras ne’e iha-ne’ebé, tanba fider I ne’e área luan tebes, ita buka nia avaria ne’e atu hetan ne’e araska la halimar,” Mario de Jesus esklarese.
Nia husu deskulpa ba kliente sira iha postu administrativu tolu ne’e, maibé nia garante katak tempu badak ahi sei lakan normál fali.
Tuir dadus kliente EDTL E.P munisípiu Bobonaro ne’ebé asesu enérjia elétrika hamutuk uma-kain 16,991.
Notísia relevante: EDTL Bobonaro preparadu fornese enérjia elétrika ba sentru votasaun
Jornalista : Sérgio da Cruz
Editór : Evaristo Soares Martins
