PMOPA faze daruak iha Ritabou reabilita kampu aviasaun
MALIANA, 26 juñu 2023 (TATOLI) – Implementasaun Programa Mão de Obra Postu Administratrativu (PMOPA) faze daruak tinan 2023, suku Ritabou, postu administrarivu Maliana, munisípiu Bobonaro, tau prioridade atu kontinua reabilita kondisaun kampu aviasaun iha Ex Kodim Maliana ne’ebé eziste dezde okupasaun Indonézia.
Xefe suku Ritabou, Maximiano dos Santos Araújo, konfirma iha PMOPA faze dahuluk foin lalais ne’e halo ona reabilitasaun liuliu monta rede, maibé to’o remata seidauk bele monta haleu kampu refere.
“Agora ita-nia programa ida PMOPA ne’e, ami ko’alia ona ho administradór postu ho tékniku sira, hadi’a hela rede ne’ebé mak aat ona, depois ha’u rekomenda tenke xave tiha kampu aviasaun ne’e, labele sai fali hanesan estrada públiku ida, agora ita halo rede metin ona konserteza ita-nia komunidade labele tama ona ba laran,” nia informa ba jornalista sira, iha kna’ar-fatin, Ritabou, segunda ne’e.
Suku Ritabou hakarak tau prioridade hadi’ak kampu refere, tanba durante ne’e movimentasaun ema, transporte motorizada ho karreta ba-mai livre no animál.
Maske fatin ne’e ativu hela ba aviaun halo operasaun emerjénsia hodi tula pasiente hosi Maliana tranfere ba Hospitál Nasionál Guidu Valadares (HNGV) Dili.
Nia subliña implementasaun programa ne’e hala’o faze pur faze hodi hein governu foun mai atu tau mós prioridade hodi halo reabilitasaun ka konstrui foun atubele fasilita aviasaun tula komunidade ba Dili.
“Governu foun mai ne’e presiza konstrui foun duni, tanba iha munisípiu Bobonaro kampu aviasaun, só ida-ne’e de’it ne’ebé presiza tau atensaun moos,” xefe suku Maximiano rekomenda.
Antes ne’e líder komunitária no lia-na’in kria no lei tara-bandu suku hodi regula komunidade sira atu labele utiliza kampu refere hodi sai dalan alternativu ida movimenta ba mai no kesi animál arbiru.
“Ha’u-nia mensajen ba komunidade sira tantu Raifun no Ritabou ne’ebé hela besik kampu aviasaun, agora ita hadi’a hela, husu labele tán animal iha laran hodi difikulta fali aviaun, karik atu mai foti ita-nia komunidade sira-ne’ebé moras atu transfere ba Dili,” líder lokál ne’e apela.
Tuir observasaun Agência Tatoli iha terrenu, nota katak komunidade kontinua uza motorizada liu iha kampu laran no balu uza ba halo treinamentu karreta. Nune’e mós fasilidade sira hanesan postu ba seguransa moos, odamatan laiha, fo’er nakonu no kampu refere moos du’ut iha parte rede ninin naruk hotu, nune’e halo komunidade kontinua kesi, karau no bibi iha kampu ninin.
Jornalista : Sérgio da Cruz
Editór : Evaristo Soares Martins
