UPF halo apreensaun ba mina-rai no sigarru ilísitu
DILI, 27 juñu 2023 (TATOLI)— Unidade Patrullamentu Fronteira (UPF) halo apreensaun ba mina-rai no sigarru ne’ebé hatama ilegál hosi fronteira terrestre hamutuk masa 49 no sigarru ho marka marboro kaixa 100 no marka Essa kaixa 18, ne’ebé negosiante Timor-oan balun hatama hosi Indonézia mai Timor-Leste.
“Ita nian UPF sira halo apreensaun ba sigarru ilísitu no mina-rai ne’ebé negosiante sira tula hosi mikrolete iha liña fronteira no atu tama ba iha villa laran. Daudaun ita asegura no halo ona prosesu identifikasaun hodi submete ba Ministériu Públiku atu hala’o kontinuasaun prosesu,” Segundu Komandante Unidade Patrollamentu Fronteira (UPF), Superintendente Asistente Polísia Carlos Monis Maia hateten ba jornalista sira iha Komandu PNTL, tersa ne’e.
Hafoin halo apreensaun ba sasan ilísitu hirak ne’e, Segundu komandante ne’e dehan na’in ba sasan sira ne’e halai lakon hotu, maske halai, maibé UPF kontinua halo prosesu ba na’in hodi submeter ba MP.
Komandante UPF ne’e rekoñese atividade kontra bandu no pasajen ilegál kontinua tanba kauza hosi nesesidade báziku, nune’e negosiante balun kontinua ba Indonézia hodi sosa sasan ilegál hirak ne’e.
“Sasán hirak ne’e bainhira hola iha Indonézia ho folin baratu, nune’e sira ba sosa mai fali faan iha Timor folin karuk, entaun hetan lukru ne’ebé makas no kauza ida seluk mak fatór dezempregu,” nia afirma.
Daudaun ne’e, nia afirma membru UPF no ekipametu ne’ebé koloka iha liña fronteira sei limitadu duni, maibé nee la sai barreira ba UPF kontinua asegura liña fronteira terrestre.
Jornalista: Natalino Costa
Editór : Florencio Miranda Ximenes
