DILI, 05 jullu 2023 (TATOLI)—Akademista hosi Dili Institute of Technology (DIT), Teodoro Marcos Mota, rekomenda ba Governu foun ba oin tenke investe maka’as iha setór produtivu sira.
“Ha’u-nia rekomendasaun ba Governu no povu Timor tomak, setór petróleu hanesan setór ne’ebé daudaun ita sei depende maka’as ba dezenvolvimentu rai ida-ne’e, maibé dezenvolvimentu hosi mina-rai ne’e rasik la’o tuir nia tempu, nune’e prinsípiu di’ak liu mak ita tenke kontinua investimentu ba setór mina-rai inklui setór produtivu seluk tanba mina-rai loron ida sei hotu,” Teodoro Marcos Mota hateten liuhosi programa live streaming entrevista eskluziva Agência Tatoli, ne’ebé hala’o iha estúdiu Farol, kuarta ne’e.
Notísia relevante : Governu iha esforsu dezenvolve posu mina iha rai-maran no setór produtivu
Nia dehan, Governu tenke hahú halo investimentu foun sira no tenke hanoin ona katak tinan-lima mai, prioridade boot investimentu iha kampu Greater Sunrise, katak negosiasaun tenke intensivu no tenke finaliza ona lejizlasaun kona-ba produsaun kontra partida.
“Ita tenke iha alvu no Governu nasaun rua (Timor-Leste no Austrália) tenke iha planu atubele aprova ona, nune’e dentru tinan-lima nia-laran bele hahú produsaun,” nia akresenta.
Akademista ne’e konsidera, Governu tenke prepara kondisaun sira hanesan kontratu negosiasaun ne’ebé la’o tenke iha asina kontratu, kadoras tenke mai Timor-Leste, nune’e kapasidade negosiasaun Timor-Leste tenke tau metin.
“Atu ita firmeza katak Governu mai fali mós nia tenke komprometidu tuir de’it, tanba durante ita haree, ita-nia rai laiha Governu ida mak propoin dehan kadoras ba Austrália, hotu-hotu intensaun kadoras mai Timor-Leste, tanba ne’e sei sustentabiliza fundu petrolóleu,” nia tenik.
Jornalista : Arminda Fonseca
Editora : Julia Chatarina
