DILI, 06 jullu 2023 (TATOLI) – Autoridade Servisu Imigrasaun Malázia deporta sidadaun timoroan na’in-haat ne’ebé mak antes ne’e sai vítima ba Ajénsia ba Fundasaun Dezenvolvimentu Komunidade Timor-Leste (FDKTL) rekruta hodi ba servisu Malázia.
Timoroan hirak ne’e ba Malázia hetan garantia hosi Ajénsia FDKTL atu ba servisu iha Malázia ho saláriu $700.
Vítima Sergio dos Santos da Costa, hateten rekrutamentu hosi Ajénsia FDKTL atu ba servisu iha Malázia tanba presiza traballadór timoroan, nune’e hatama osan ba ajénsia ne’e ho montante osan $2000 kada ema.
“Ha’u ba Malázia iha juñu tinan kotuk, halo ona tinan ida, ema ne’ebé simu ami mak maun Joanico, antes ami atu aranka ba Malázia ajénsia ida haruka ami ne’e dehan imi ba servisu iha ne’e saláriu $700 fulan ida. Maibé ami to’o tiha ne’ebá ami servisu saláriu la to’o ne’e mak ami fila mai realidade ami servisu iha ne’ebá osan bo’ot. Ami hetan sariu $150, la’e hetan $200. Ne’e mak ami hili dalan hakarak fila”, Sergio dos Santos da Costa ba jornalista sira iha Aeroportu Internasionál Nicolau Lobato,Comoro, kinta ne’e.
Ajénsia Dezenvolvimentu Komunidade Timor-Leste (FDKTL) ne’e nia fundasaun iha Kupang.
“Ha’u bá iha fulan jullu ne’e, tinan ida ona. balun bá foin fulan-lima, fulan-neen, iha tán iha ne’ebá, balu seidauk fila, balu atu fila ne’ebé tanba osan seidauk to’o, ne’ebé sira servisu buka hela osan, depois mak fila, ami-nia dokumentu sira di’ak hela, problema mak osan tanba ne’e nia husu ba autoridade Malázia hakarak fila tanba salariu ne’ebé ami simu ki’ik ne’e maka, ami hakarak fila”, nia dehan.
Tanba ajénsia ne’e antes ne’e promete katak servisu iha Malázia ne’e osan bo’ot buat seluk ne’e lne’;e mak hanesan timor oan sai hosi ne’e ne’e bá, hodi uza osan rasik, maske deve ema nia osan seiduk selu to’ola de’it.
Vítima Sergio dos Santos da Costa, hateten na’in-haat ne’e balun servisu hanesan dada rede no balu servisu iha plástiku, balun servisu iha eletrisidade hodi dada fiu.
“Ami sente triste oituan, maibé tanba buat ne’e hanesan esperiénsia ida ba ita atu bele hatene di’ak liután, loron seluk atu labele tuir tán lasu sira ne’ebé halo”, nia informa
Nia husu atu ajénsia ne’ebé lori sira ba servisu iha Malázia liuliu ajénsia FDKTL atu responsabliza ba nia aktu tanba timoroan ne’ebé servisu Malázia ne’e hothotu sai vítima.
“Ami hakarak husu ba ita-nia parte seguransa liuliu PNTL, sé bele karik, hanesan situasaun sira hanesan ne’e, bele kaptura ema ne’ebé responsavél ba DFKTL hodi responsabiza ba nia aktu tanba ema sai ona vítima”, Sergio dos Santos hateten.
Nia subliña, iha oras ne’e traballadór timoroan na’in-hitu mak sei iha hela Embaixada Timor-Leste iha Malázia sei fila iha tempu badak nia-laran.
Traballadór timoroan na’in-haat ne’ebé mak sai vítima ba ajénsia FDKTL mai ho aviaun Bhutan Royal hosi Malázia iha kinta dader ne’e no asegura kedan hosi ekipa konjunta ne’ebé lideradu hosi Polísia Nasionál Servisu Investigasaun Kriminál hodi lori kedan ba Departementu Investigasaun Kriminál Komandu Jerál PNTL hodi submete ba prosesu identifikasaun iha oras 12 nia-laran hafoin husik sira.
Jornalista: Natalino Costa
Editór : Zezito Silva
