MALIANA, 10 jullu 2023 (TATOLI) – Autoridade Seguransa no Defeza komposta hosi Polísia Nasionál Timor-Leste (PNTL), munisípiu Bobonaro no FALINTIL Forsa Defeza Timor-Leste (F-FDTL) inklui Batallaun Orden Públika (BOP, sigla portugés), segunda ne’e bolu urjente lideransa grupu arte-rituál hosi K-2000 ho 77 inklui autoridade lokál sira atu halo mediasaun ba kazu konfrontu ne’ebé beibeik akontese iha suku Ritabou, postu administrativu Maliana.
Mediasaun refere envolve mós sub-Komisaun Reguladora Arte-Marsiál (KRAM) no Diresaun Nasionál Prevensaun Konflitu Komunitária (DNPKK) no administradór postu administrativu Maliana, Tomás Laco-Loe no lideransa komunitária kompostu hosi xefe aldeia no xefe suku Ritabou.
Segundu Komandante PNTL Munisípiu Bobonaro, Superintendente Asistente Fasio de Jesus Lima, hateten durante loron rua tuituir malu hahú hosi sábadu to’o domingu ne’e akontese konfrontu entre grupu arte-rituál K-2000 ho 77 rezulta komunidade nia uma no sasán hetan estragu.
Ho aktu grupu arte-rituál hirak-ne’e halo komunidade paniku no kazu refere sai mós preokupasaun órgaun soberanu liuliu Prezidente Repúblika.
Tanba ne’e nia aprofunda, autoridade seguransa bolu lideransa organizasaun arte-rituál sira, atubele koopera hodi identifika no entrega membru sira-ne’ebé durante ne’e organiza malu kria instablidade iha suku laran hodi submete ba prosesu investigasaun.
“Ita-nia objetivu tuur hamutuk iha-ne’e oinsá atu garantia pás no estabilidade, liuliu iha suku Ritabou, ita tuur hamutuk iha-ne’e hamosu kompromisu ida katak problema ne’ebé akontese labele iha kontinuasaun,” nia informa ba jornalista sira, hafoin enkontru iha Komandu PNTL Munisípiu Bobonaro.
Nia akresenta, bazea ba kompromisu ne’ebé halo lideransa arte-rituál no autoridade lokál sira sei hamosu deklarasaun ida ba autoridade seguransa hodi garante katak aktu hirak-ne’ebé grupu sira halo sei la akontese tán.
“Aban sira entrega ba komandu atu sai referénsia ida, hodi garante estabilidade iha fatin ne’ebá, bainhira hamosu ona deklarasaun ne’e orden autoridade nian. Sé kuandu sira la kumpre maka ita dezobediénsia ba orden autoridade seguransa ne’ebé autoridade kompetente atu halo prevensaun,” nia dehan.
Nune’e, autoridade seguransa mós sei kontinua halo vijilánsia iha Ritabou, liuliu fatin ne’ebé konsideradu risku ba problema, tanba ne’e apela ba joven sira hahú tuku 19:00 kalan labele tuur iha estrada ninin no hemu lanu.
Responsável grupu arte-rituál 77 Munisipiu Bobonaro, Apolinário dos Santos, agradese ba inisiativa hosi autoridade seguransa sira tanba liuhosi meiu ne’e bele prevene kazu krime sira ne’ebé sempre akontese beibeik iha Ritabou.
“Ami iha vontade no responsabilidade tomak atubele koopera ho seguransa no autoridade hotu-hotu oinsá atu garantia estabilidade, hahú agora hodi ba oin, ami-nia membru ne’ebé mak komete krime ami identifika ona no sei entrega ba PNTL atu kontinua prosesu ne’e ba oin,” nia katak.
Enkuantu konfrontu refere akontese iha loron-sabadu, 08 fulan-jullu no domingu, rezulta komunidade nia uma, sasán uma laran hetan estragu.
Notísia relevante: Konfrontu iha Bobonaro rezulta uma rua hetan estragu
Jornalista: Sérgio da Cruz
Editór: Evaristo Soares Martins
