UPF detein timoroan ida tenta hatama ‘roupa uzadu’ ho dalan ilegál ba Indonézia
MALIANA, 20 jullu 2023 (TATOLI) – Polísia servisu sekreta liuhosi Unidade Patrullamentu Fronteira (UPF), kuarta ne’e entre tuku 20:00 ou tuku 21:00 kalan, detein sidadaun timoroan mane ida ne’ebé tenta hatama ‘roupa uzadu’ ho dalan ilegál ba Atambua, kabupaten Belu, provínsia Nusa Tenggara Timur, Repúblika Indonézia.
Komdante UPF Interinu, Superintendente Asistente Carlos Moniz, konfirma sidadaun refere ne’e servisu sekreta deteta iha área Palaka, postu administrativu Balibo, munisípiu Bobonaro, bainhira tenta hatama roupa uzadu ka obralan pakote rua liuhosi fronteira marítima.
Notísia relevante:UPF halo apreensaun ba mina-rai no sigarru ilísitu
“Ita-nia servisu sekreta deteta tán sidadaun Timor-Leste ne’ebé mak tenta atu lori roupa OB hatama iha área Palaka nia atu ba Indonezia uza ró, ita konsege deteta, agora daudaun iha hela kuartél UPF nia fatin, sasán ne’e nia na’in mós iha, ita sei halo identifikasaun hafoin ita entrega ba iha postu Polísia Batugade hodi halo prosesu kontinuasaun,” nia informa liuhosi telefónika, kinta ne’e.
Iha parte seluk, iha loron-kuarta ne’e por vota tuku 04:00 ne’e servisu sekreta mós konsege identifika karreta tanki ida tula minarai ilegál iha área Palaka ninia atu lori ba Dili.
“Sira buka-tuir no sira kontaktu ho komandu munisípiu Liquiçá ne’e mk konsege prende (halo apreensaun) ba kareta ne’ebé tula minarai por volta litru 4000-resin, tanba prende iha área jurídiku Liquiçá ninian, ita husik sira mak halo prosesu,” nia akresenta.
Adjuntu komandante UPF ne’e haktuir, loron tolu liubá ne’e mós serbisu sekreta halo apreensaun ba sasán ilísitu hanesan gazoel no sigarru iha área Akadiru-laran, postu Derokren.
“Sidadaun sira-ne’e hela iha área Leohitu ninian maka halo asaun ne’e, ita halo apreensaun,” nia hateten.
Ho situasaun hirak-ne’e Governu liuhosi Ministériu Interior mós tau ona prioridade ba seguransa iha liña fronteira ho bele minimiza atividade tranzaksaun ilegál.
Notísia relevante:UPF detein timor-oan ida lori osan rupiah hosi Bobonaro mai Dili
Jornalista: Sérgio da Cruz
Editór: Evaristo Soares Martins
