Klube 14 rejista iha AFB atu kompete jogu sub-livre
MALIANA, 31 jullu 2023 (TATOLI)-Dadus provizoriu klube hamutuk 14 mak rejista ona iha Asosiasaun Futeból Bobonaro (AFB) atu kompete iha jogu sub-livre taxa rotativa epoka 2023.
Prezidente AFB, Domingos Gouveia Moniz ‘Tanenti’, esplika, klubu hirak ne’e rua tolu hosi postu administrativu Balibó, Maliana ualu, Cailaco ida no Bobonaro rua.
Notísia relevante:AFB rejista klubu 12 atu kompete iha TELKOMCEL Cup sub-17
“Agora daudaun klubu 14 mak rejistu ona, maibé klubu lima mak sei mai tán, Atabae mós horisehik telefone ona sei reprezenta klubu ida,” nia informa ba jornalista sira, iha edifisiu administrasaun munisipál Bobonaro, segunda ne’e.
Nia subliña, jogu ne’e sei realiza iha fulan ne’e hodi anima komunidade Maliana, maibé nia data albertura sei bazeia Tecknical Meeting ne’ebé sei hala’o iha loron (05/08) ne’e.
Enkuantu lideransa AFB ne’e konfirma komisaun organizadora mós autoriza jogadór nasionál ne’ebé joga iha liga bele envolve kada klubu ema na’in rua.
“Liu hosi jogu ida ne’e, ita hakarak motiva ita nia jogadór foun sira sub 17 ba leten bele kahur ho nia senior sira, atubele hetan esperiensia foun no iha mentalidade di’ak liután,” nia dehan.
Enkuantu AFB aloka orsamentu rihun $4,250, hosi montante ne’e rihun $1 fahe ba item sira seluk tan.
Notísia Relevante:AFB identifika terinadór 22 partisipa formasaun hosi FFTL
Jornalista: Sergio da Cruz
Editór: Evaristo Soares Martins
