PDHJ planeia koloka pontu fokál iha Covalima no Viqueque
MALIANA, 02 agostu 2023 (TATOLI) – Provedoria Direitu Humanu no Justisa (PDHJ) planeia hahú tinan oin sei koloka pontu Fokál iha munisípiu Covalima no Viqueque hodi atende keisa ba kazu violasaun direitu umanu no violasaun boa governasaun.
Notísia relevante: PDHJ husu TR halo fiskalizasaun abstrata ba Estatutu PNTL
Provedór Direitu Umanu no Justisa, Virgílio da Silva Guterres ‘Lamukan’, esplika planu atu estende delegasaun territoriál Maliana ba munisípiu Covalima, no delegasaun territoriál Baucau ba munisípiu Viqueque ne’e fahe serbisu.
“Tanba hosi Maliana ba Suai ne’e dook, entaun ami hanoin hahú tinan oin bele iha pontu fokál ne’ebé ke esperiénsia servisu ona iha Suai, atubele atende keixa no monitorizasaun, maibé submete nafatin ba delegasaun territoriál Maliana nian, ita sei aumenta mós ida iha Viqueque atubele fahe servisu,” nia hato’o asuntu ne’e iha salaun enkontru administrasaun munisípál Bobonaro, tersa ne’e.
Líder másimu PDHJ ne’e hakle’an, planu ne’e ho objetivu atu hakbesik liután servisu ba públiku liuliu komunidade sira iha baze hodi halo finalizasaun, monitorizasaun ba serbisu estadu nian inklui haree kazu abuzu podér no violasaun direitu umanu.
“Tanba dalaruma iha fatin balu abuzu podér no violasaun direitu umanu ne’e mosu, maibé tanba populasaun sira dook hosi fatin, entaun sira labele ba hato’o keisa iha PDHJ,” provedór hateten.
Notísia relevante: PDHJ buka hatene dezafiu ne’ebé Autoridade RAEOA enfrenta no presiza garante boa governasaun
Jornalista: Sérgio da Cruz
Editór: Evaristo Soares Martins
