MALIANA, 03 jullu 2023 (TATOLI)- Ai Lantoro hun ida monu tun hamate kedas ema na’in-rua iha estrada nasionál aldeia Tunubibi, suku Tapo-Memo, postu administrativu Maliana, munisípiu Bobonaro.
Sidadaun na’in-rua ne’e ida mane ho naran, Lucio Gomes dos Santos idade 30 hanesan Ojek hosi aldeia Tunubibi no ida feto naran Belina Made Mau moris iha tinan 1983 hanesan pasajeira.
Tuir informasaun ne’ebé Ajensia Tatoli rekolla iha terrenu katak, insidente ne’e akontese iha tuku 11:00, bainhira mane ne’e tula pasajeiru ho motorizada marka ‘REVO’ hosi diresaun fronteira Mozon atu ba Maliana Vila.
Maibé seidauk to’o iha fatin destinasaun iha dalan klaran ai-Lantoro monu hakotu kedas sira rua nia vida iha dalan klaran.
Tuir observasaun Agensia Tatoli rekoila katak ai-refere ahi-han monuk mak monu.
Hafoin akontese, Autoridade Protesaun Sivíl Munisipiu Bobonaro no Polísia Nasionál Timor-Leste to’o kedas iha fatin akontesimentu hodi rekolla informasaun no tesi-kedas ai refere.
Akontesimentu refere konsege hamosu engrafamentu ba transporte públiku no privada diresaun Tunubibi ba Maliana Vila. Dadaun ne’e matebian na’in rua no ida mane lori ona bá nia rezidensia Tunubibi no feto lori ba Maliana vila.
Jornalista: Sérgio da Cruz
Editór: Evaristo Soares Martins
