DILI, 07 agostu 2023 (TATOLI)–Embaixadór Malázia iha Timor-Leste, Amarjit Sarjit Singh, konkorda ho polítika IX Governu nian ne’ebé atu foku ba desentralizasaun no poder lokál.
“Ha’u halo ona vizita kortezia ho Primeiru-Ministru Xanana, ami diskute kona-ba relasaun nasaun rua nian. Iha oportunidade ne’e ko’alia mós kona-ba aspetu serbisu hamutuk iha futuru entre Malázia ho Timor-Leste, Primeiru-Ministru tau atensaun ba importánsia dezentralizasaun iha Timor-Leste no husu Governu Malázia hodi buka meiu fó apoiu hanesan fó formasaun ba funsionáriu sira, liu-liu iha aspetu rua importante mak planeamentu no finanseiru nian,” Amarjit Sarjit hateten hafoin hasoru malu ho Primeiru-Ministru, Kay Rala Xanana Gusmão, iha Palásiu Governu, segunda ne’e.
Notísia relevante : Malázia deporta traballadór timoroan na’in-haat
Nia konsidera katak esforsu Xefe Ezekutivu nian ba aspetu rua ne’e hanesan inísiu di’ak tebes ba governasaun.
“Ida-ne’e Malázia hosi kedas tinan 2000 mai ne’e ita fó ona formasaun ba funsionáriu 600 liu ho nia tipu oin-oin liuhosi programa The Malaysian Technical Cooperation Program (MTCP), no ita sei oferese programa formasaun ida-ne’e ba funsionáriu sira, maibé nafatin foku aspetu rua ne’e,” nia akresenta.
Nune’e, Primeiru-Ministru Xanana husu ba Embaixadór atubele sai ponte hodi liga Governu país rua bazeia ba nesesidade Timor-Leste.
Jornalista : Antónia Gusmão
Editora : Julia Chatarina
